Skýrslutökur héldu áfram í Reykholtsmálinu í dag. Starfsmenn lögreglu og læknar gáfu skýrslur.
Sex Íslendingar, fimm karlar og ein kona, eru ákærð fyrir að halda manni föngnum á heimili sínu í Reykholti í Bláskógabyggð og beita hann harkalegu ofbeldi til þess að hafa af honum fé í apríl 2024.
Vonast var til að skýrslutökum myndi ljúka í dag en það reyndist ekki mögulegt vegna erfiðleika með túlkun á vitnisburði erlendra lækna.
Ekki hægt að rekja DNA af sakborningum til vopna á vettvangi
Fyrsta skýrsla lögreglu sneri að DNA-rannsókn af vettvangi. Lögreglumaður gaf skýrslu fyrir rétti og sagði að hnúajárn og strigalímband hefðu verið send til DNA-rannsóknar.
Á límbandinu hefðu fundist ummerki um blóð og það blóð hefði reynst úr brotaþola. Á hnúajárninu reyndist DNA úr Andra Má, Ingunni, föður hennar og brotaþola. Greinilegt hefði verið að margir hefðu umgengist vopnið en niðurstöður hefðu ekki bent til þess að rekja mætti vopnið til eins þeirra umfram hinna.
Stálu alls 17,6 milljónum
Önnur skýrslan sem tekin var af lögreglu sneri að peningaþvætti í málinu. Starfsmaður lögreglu sem gerði fjármálagreiningu gaf skýrslu í dag.
Hún sagði að alls hefðu 17,6 milljónir verið teknar af reikningum brotaþola. Þá greindi hún einnig hvað hver og einn fékk í sinn hlut. Þar kom fram að alls hefði Andri Már Mortensen Birgisson fengið 8,5 milljónir króna og bróðir hans 3,7 milljónir króna. Ingunn Rut hefði fengið 3,5 milljónir króna og faðir hennar eina milljón og 960 þúsund krónur.
Millifærslur hefðu verið framkvæmdar eftir að peningarnir voru teknir. Meðal annars hefði faðir Ingunnar fært um 600 þúsund krónur inn á Andra. Faðir hennar lýsti þessu sjálfur í sinni skýrslu fyrir dómi. Einnig hefðu aðrar millifærslur verið framkvæmdar inn á reikning bróður Andra Más.
Starfsmaður lögreglu sagði að einnig hefði verið skoðað hvernig peningunum var ráðstafað. Áður hefur komið fram að Andri Már er sagður hafa keypt sér gullúr og gullkeðju eftir atvikið en mögulega einnig mótorhjól. Þá hefur komið fram að svo virtist sem Andri Már hefði stefnt á frekari brot gegn brotaþola þar sem hann hefði aðgang að persónulegum upplýsingum hans og rafrænum skilríkjum.
Staðfesti að Andri ætti haglabyssuna
Tvær skýrslur voru teknar af vitnum sem ekki geta talist sérfræðingar í málinu. Hin fyrri var af manni sem var kunningi Andra Más og Ingunnar Rutar og bjó hjá þeim um tíma. Taka átti skýrslu af honum fyrir helgi en hún náðist ekki. Viðkomandi vitni staðfesti að haglabyssa sem fannst við húsleit væri í eigu Andra. Fram kom að Andri og Ingunn hefðu hins vegar sagt að vopn og öll fíkniefni sem fundust á heimili þeirra hefðu verið í eigu þessa vitnis.
„Já, flott hjá þeim,“ svaraði vitnið en kaus að svara ekki spurningum um það þar sem þær sneru að mögulegri sök hans sjálfs.
Vilhjálmur Vilhjálmsson, einn verjandi í málinu, spurði manninn þá hversu hár maðurinn væri. Vitnið furðaði sig á þessu en svaraði að hann væri rétt rúmlega tveir metrar. Fram hefur komið í málinu að brotaþoli sagði stóran mann hafa ráðist á sig föstudagskvöldið sem frelsissviptingin hófst.
Önnur skýrslan var tekin af konu sem einnig er vinnuveitandi brotaþola. Hún endurtók að mestu það sem áður var sagt þegar ítarleg skýrsla var tekin af hinum vinnuveitanda brotaþola og má lesa nánar um hér fyrir neðan.
Vandræði með túlk tefja aðalmeðferð
Taka átti skýrslu af þremur læknum á Möltu en vitað er að brotaþoli fékk ummönnum þar eftir að hann var sendur þangað frá Íslandi. Túlki reyndist þó erfitt að þýða það sem fyrsti læknirinn hafði að segja. Ákveðið var því að endurtaka þá skýrslu og fresta hinum tveimur þangað til annar túlkur hefði fundist.
Mun þurfa meðferð við áfallastreituröskun
Einn læknir sem framkvæmdi skoðun á brotaþola eftir að hann kom aftur til Íslands gaf skýrslu. Hann sá einnig um að þýða skýrslu maltnesku læknanna yfir á íslensku. „Undir höfði og hálsi fann ég dökkleit för við vanga. Hann átti erfitt með að opna munninn. Hann gat bara opnað hann tvær til þrjár fingurbreiddir,“ sagði hann. Þá hefði einnig verið mar á brjóstkassa neðarlega vinstra megin, hrufl á bakinu og á efri útlimum hægra megin. Þá hefði hann verið með tvíbrotinn kjálka. Þegar læknirinn var beðinn um að meta hvort áverkar mannsins hefðu verið alvarlegir sagði hann svo vera.
Tannlæknir sem meðhöndlaði brotaþola eftir að hann kom aftur til Íslands gaf skýrslu um skoðun sína. Vantað hefði í manninn nokkrar tennur og sagði tannlæknirinn að það liti út fyrir að þær tennur hefðu verið fjarlægðar nýlega. Ekki væri hægt að fullyrða að það hefði gerst fyrir mjög stuttu þar sem sárin væru byrjuð að gróa en tennurnar hefðu verið fjarlægðar nýlega.
Tveir sálfræðingar sem höfðu brotaþola til meðferðar gáfu skýrslu í dag. Báðar sögðu að brotaþoli hefði verið með alvarleg áfallaeinkenni. Þær töldu báðar að ekki hefði verið tímabært að greina brotaþola með áfallastreituröskun en önnur þeirra sagði hann bera öll þess merki að þurfa meðferð við slíku. „Það myndi ég telja afar líklegt. Hann mun klárlega þurfa meðferð við áfallastreituröskun af síðustu kynnum mínum af honum,“ sagði einn sálfræðinganna. Báðar veittu manninum meðferð árið 2024.
