Björgunarsveitir hafa verið kallaðar út á hæsta forgangi eftir að ferðamenn sáu til einstaklings ofan í gilinu við Háafoss. Ferðamennirnir höfðu samband við neyðarlínuna um 18:45 í kvöld. Frá þessu greinir Vísir.
Ekki er víst hvort ferðamennirnir hafi náð sambandi við manninn ofan í gilinu og ekki liggur fyrir hvort þarna sé um að ræða ferðamann sem skilaði sér ekki á gististað á þriðjudagskvöldið eftir að hann fór í göngu á svæðinu.
Umfangsmikil leit fór fram að ferðamanninum en hún bar ekki árangur. Meðal annars var notast við dróna, hunda og straumvatnsleitarfólk. Bíll ferðamannsins fannst við Hólaskóg en þaðan liggur vegur upp að útsýnisstað við fossinn. Leit var svo frestað á miðvikudagskvöldið.
Að sögn upplýsingafulltrúa Landsbjargar hefur þyrla Landhelgisgæslunnar verið kölluð út og brugðist er við útkallinu eins og þarna sé um mann í neyð að ræða.
