Bandero, skip Paul Watson-samtakanna, hefur nálgast hvalveiðiskip Hvals hf. og hefur gert tilraunir til að trufla för þess. Þetta staðfestir Magnús Pálmar Jónsson, aðgerðastjóri hjá Landhelgisgæslunni.
Magnús sagðist ekki geta veitt frekari upplýsingar að svo stöddu.
Eftir því sem fréttastofa kemst næst er það skipið Hvalur 9 sem Bandero hefur nálgast. Mbl.is hermir að Bandero hafi verið siglt utan í Hval 9 en Landhelgisgæslan hefur ekki staðfest það.
Landhelgisgæslan hefur sent viðbragð vegna þessa en ekki liggur fyrir hvers eðlis það er eða hve umfangsmikið.
Bandero hefur verið í íslenskri efnahagslögsögu í þeim yfirlýsta tilgangi að fylgjast með og stöðva hvalveiðar.
Fréttin hefur verið uppfærð.
