Bæjarstjóri Kópavogs segir engan samning við Samtökin ’78 til staðar en oddviti Miðflokks er með samninginn undir höndum

Rithöfundurinn Stefán Máni tók undir og spyr á hvaða leið flokkurinn væri.

Bæjarstjóri hafnar tilvist samnings

Ásdís Kristjánsdóttir, bæjarstjóri í Kópavogi, blandaði sér í umræðuna og hafnaði því að Kópavogsbær hefði gert slíkan samning.

„Kópavogsbær hefur ekki sem sveitarfélag samið við samtökin, og engin breyting orðið á því. Við erum með fræðslusjóð sem skólarnir sjálfir nýta. Það er í sjálfsvald hvers skóla sett að nýta sjóðina eins og þeir kjósa,“ skrifaði hún.

Einar Jóhannes, oddviti Miðflokksins í Kópavogi, svaraði yfirlýsingu bæjarstjórans og sagði hana fara með rangt mál. Hann sagðist hafa sent fyrirspurn á bæjarskrifstofu Kópavogs og fengið skjót svör og væri nú með samninginn undir höndum. Einar Jóhannes benti á að um væri að ræða skuldbindandi samning við samtökin þar sem þau myndu sinna ýmsum verkefnum á vegum bæjarins.

Samningur liggur fyrir

Nútíminn hefur samninginn undir höndum, en hann sýnir að formlegur þjónustusamningur er sannarlega til staðar milli Menntasviðs Kópavogsbæjar og Samtakanna ’78, en samningurinn er undirritaður 6. janúar 2026.

Undir samninginn skrifa Amanda K. Ólafsdóttir, skrifstofustjóri menntasviðs Kópavogs, og Kári Garðarsson, framkvæmdastjóri Samtakanna ’78.

Samkvæmt samningnum skuldbindur Kópavogsbær sig til að greiða samtökunum samtals um 5,5 milljónir króna á ári á árunum 2026 til 2028.

Samningurinn nær meðal annars til fræðslu fyrir starfsfólk grunn- og leikskóla, fræðslu fyrir starfsfólk í frístundastarfi, fræðslu fyrir nemendur í 8. bekk grunnskóla og fræðslu fyrir íþróttafélög innan bæjarins. Þá er einnig í samningnum að samtökin veiti ráðgjafaþjónustu fyrir hinsegin fólk og aðstandendur þeirra, sem bærinn greiðir fyrir með sérstöku framlagi.

Í samningnum kemur fram að fræðslan sé skipulögð í samráði við menntasvið bæjarins og að markmið hennar sé meðal annars að draga úr fordómum og mismunun og auka þekkingu á málefnum hinsegin fólks.

Óljóst hvort um misskilning sé að ræða

Óljóst er hvort bæjarstjóri hafi vísað til þess að samningurinn sé gerður af menntasviði bæjarins fremur en sveitarfélaginu í heild, eða hvort um misskilning sé að ræða varðandi eðli samningsins.

Hins vegar liggur fyrir að samningurinn kveður skýrt á um að Kópavogsbær, í gegnum menntasvið sitt, sé þjónustukaupi og greiði fyrir þjónustuna.

Ekki náðist í Ásdísi Kristjánsdóttur við vinnslu fréttarinnar en svar hennar verður birt ef það berst.