Bændasamtökin hafa boðað til aukabúnaðarþings í ágúst. Þingið mun álykta um niðurstöður skýrslu um áhrif aðildar Íslands að Evrópusambandinu á íslenskan landbúnað.
Á Búnaðarþingi í mars var ákveðið að skipa milliþinganefnd sem átti að greina áhrif bæði aðildarviðræðna og aðildar Íslands að ESB á íslenskan landbúnað. Nefndin hefur verið að störfum síðan þá og unnið með sérfræðingum innan og utan Bændasamtakanna að gerð skýrslu, sem er á lokametrunum.
Á þinginu, sem fer fram 14. ágúst, verða niðurstöður skýrslunnar kynntar og þingið mun álykta um þær. Allt í tæka tíð fyrir þjóðaratkvæðagreiðsluna sem fram fer 29. ágúst.
„Sko við viljum einfaldlega bara leggja grunn að upplýstri umræðu. Verkefnin eru að safna þessum staðreyndum og greina af fagmennsku og leggja þær fram með gagnsæjum hætti. Og að forðast þessar innihaldslausu staðhæfingar og einfalda slagorðaumræðu um mikilvægt mál. Þetta er náttúrlega mál sem snertir ekki bara bændur heldur íslenskt samfélag í heild,“ segir Margrét Ágústa Sigurðardóttir, framkvæmdastjóri Bændasamtakanna. Samtökin hafa lagt mikla áherslu á að skýrslan sé faglega unnin og að hún sé nákvæm.
Þetta er mjög fagleg nefnd. Hún er skipuð fimm bændum úr ólíkum búgreinadeildum og sérfræðingar bæði innan og utan skrifstofu bændasamtakanna koma að þessari vinnu. Meginmarkmið nefndarinnar sem slíkt að það sé allt byggt á röksemdum og heimildum svo forsendur séu rétt gefnar.
