Alls voru 13.100 atvinnulausir á aldrinum 16 til 74 ára í maí samkvæmt árstíðaleiðréttum niðurstöðum vinnumarkaðsrannsóknar Hagstofunnar.
Árstíðaleiðrétt hlutfall atvinnulausra var 5,6%, hlutfall starfandi var 76,5% og atvinnuþátttaka 81,1% að því er segir í tilkynningu.
Á heildina litið urðu nánast engar breytingar á niðurstöðunum milli mánaða, þó hlutfall starfandi og atvinnuþátttaka hækkaði lítillega.
Samkvæmt mælingu vinnumarkaðsrannsóknar Hagstofunnar var atvinnuleysi 8,3% í maí síðastliðinn. Fjöldi atvinnulausra var um 19.800. Hlutfall starfandi var 74,8%, sem samsvarar tæplega 219.300 einstaklingum, og atvinnuþátttaka var 81,6% eða um 239.100 manns á vinnumarkaði.
Á vormánuðum er algengt að ungu fólki á vinnumarkaði fjölgi þegar það hefur leit að sumarstörfum. Það má sjá í tölum um maí þegar atvinnuleysi fólks á aldrinum 16 – 24 ára mældist 23,8% samanborið við 5,1% hjá 25 ára og eldri.
