Við ljúkum þessari fréttavakt um skotárás á kvöldverði samtaka blaðamanna Hvíta hússins, þar sem Donald Trump Bandaríkjaforseti og ráðherrar hans voru meðal gesta.
Árásarmaður skaut nokkrum skotum við öryggishlið fyrir utan salinn þar sem kvöldverðurinn var haldinn. Bandaríkjaforseti, forsetafrúin Melania, ráðherra í Bandaríkjastjórn og fleiri háttsettir gestir voru fluttir burt í skyndi í öruggt skjól. Enginn gestanna varð fyrir skoti.
Árásarmaðurinn skaut einn leyniþjónustumann en skotið hæfði öryggisvesti mannsins sem slasaðist ekki alvarlega. Árásarmaðurinn var yfirbugaður skjótt og örugglega. Todd Blanche dómsmálaráðherra segir að ákærur verði gefnar út fljótlega.
Bandaríkjaforseti birti síðar um kvöldið myndir af byssumanninum á Truth Social og stuttu síðar upplýstu erlendir fjölmiðlar að maðurinn héti Cole Thomas Allen. Allen er 31 árs að aldri og er frá Torrance í Kaliforníu.
Bandaríkjaforseti hélt blaðamannafund í Hvíta húsinu þar sem hann fór yfir atburði kvöldsins og hrósaði leyniþjónustunni og lögregluyfirvöldum fyrir frábært starf og fyrir að hafa brugðist fljótt og vel við aðstæðum. Hann sagði að Melania forsetafrú væri í áfalli eftir skotárásina.
Aðspurður út í það hvort öryggi hafi verið betra á kvöldverðinum en í Butler í Pennsylvaníu þegar Trump varð fyrir morðtilraun í júlí 2024, sagði Trump svo vera. Í það minnsta hefði öryggisvarsla verið mun betri á kvöldverðinum og því komst byssumaðurinn ekki inn í salinn þar sem kvöldverðurinn var haldinn.
Atburðarásin á galakvöldverði samtaka blaðamanna Hvíta hússins, þar sem árásarmaður skaut nokkrum skotum, er farin að skýrast.
Trump Bandaríkjaforseti og eiginkona hans Melania, auk ráðherra í Bandaríkjastjórn og ýmissa annarra háttsettra starfsmanna bandaríkjastjórnar, voru gestir á kvöldverðinum, auk fjölda blaðamanna og fjölmiðlafólks. Kvöldverðurinn var svo til nýhafinn og skömmu áður en Trump átti að halda ræðu heyrðust nokkrir skothvellir. Gestir áttuðu sig þó ekki strax á því sem var að gerast.
Árásarmaðurinn skaut 7-8 skotum úr vopni sínu nærri öryggishliðið við innganginn í salnum þar sem kvöldverðurinn fór fram. Gestir skýldu sér undir borðum og lífverðir og öryggisverðir fylgdu Bandaríkjaforseta, forsetafrúnni og öðrum háttsettum gestum burt af vettvangi í öruggt skjól. Árásarmaðurinn skaut einn leyniþjónustumann en skotið hæfði öryggisvesti mannsins sem slasaðist ekki alvarlega. Árásarmaðurinn var yfirbugaður skjótt og örugglega.
Trump birti skömmu síðar færslur á Truth Social þar sem hann mærði viðbrögð leyniþjónustunnar og annarra sem tóku þátt í aðgerðunum. Hann sagðist hafa viljað halda áfram með kvöldverðinn en var ráðlagt frá því. Hann birti einnig ljósmyndir af árásarmanninum á Truth Social. Á blaðamannafundi í Hvíta húsinu sem hófst á þriðja tímanum í nótt að íslenskum tíma ræddi Bandaríkjaforseti atburði kvöldsins við fjölmiðla.
Kvöldverður samtaka blaðamanna Hvíta hússins hefur verið haldinn árlega síðan 1921 og hefð er fyrir því að sitjandi Bandaríkjaforseti sé heiðursgestur kvöldverðarins. Þetta er þó í fyrsta sinn sem Trump þiggur boð á kvöldverðinn sem mun eflaust seint líða gestum kvöldsins úr minni.
The New York Times nafngreinir byssumanninn sem Cole Thomas Allen. Hann er sagður 31 árs að aldri, en ekki 30 ára eins og fyrst kom fram í erlendum fjölmiðlum. Allen er frá Torrance í Kaliforníu.
Haft er eftir saksóknara, Jeanine Pirro, að maðurinn verði ákærður fyrir notkun skotvopna og fyrir árás á alríkislögreglumann með hættulegu vopni. Hún segir að fleiri ákærur fylgi í kjölfarið.
Samkvæmt breska ríkisútvarpinu BBCvar Allen þungvopnaður haglabyssu, handbyssu og auk þess með marga hnífa á sér. Allen skaut einn leyniþjónustumann en skot hans hæfði öryggisvesti mannsins. Hann var fluttur á spítala til aðhlynningar og er við góða heilsu.
Trump hefur lokið blaðamannafundinum en við höldum áfram að fjalla um málið.
Bandaríkjaforseti segir að Melania forsetafrú sé í áfalli eftir atburði kvöldsins. Hann segir að hann hefði viljað vera áfram á kvöldverðinum en það var ekki talið öruggt.
Todd Blanche dómsmálaráðherra segir að ákærur verði gefnar út fljótlega á byssumanninn. Hann segir lögregluna og leyniþjónustuna hafa brugðist hárrétt við. Hann segir að kvöldið hafi sýnt það besta og versta í landinu, samkvæmt breska ríkisútvarpinu BBC.
Trump sagði að hótelið sem hýsti kvöldverðinn, Washington Hilton hótelið, hefði ekki verið sérlega öruggt miðað við þær aðstæður sem sköpuðust þarna. Hótelið hefur hýst fjölmarga mikilvæga pólitíska viðburði frá opnun árið 1965.
Trump sagði að hann teldi að byssumaðurinn hefði verið einn að verki.
Aðspurður út í það hvort öryggi hafi verið betra á kvöldverðinum en í Butler í Pennsylvaníu þegar Trump varð fyrir morðtilraun í júlí 2024, sagði Trump svo vera. Í það minnsta hefði öryggisvarsla verið mun betri á kvöldverðinum og því komst byssumaðurinn ekki inn í salinn þar sem kvöldverðurinn var haldinn.
Trump birti rétt í þessu myndir af byssumanninum á Truth Social þar sem hann liggur að því er virðist handjárnaður á höndum. Hann sagði í færslu á Truth Social að hann yrði með blaðamannafund í Hvíta húsinu innan skamms. Hann og forsetafrúin, sem og ráðherrar, séu öll heil á húfi. Í samráði við skipuleggjendur kvöldverðarins verði viðburðurinn endurtekinn innan 30 daga.
Lögregluyfirvöld hafa handtekið grunaðan byssumann sem er 30 ára karlmaður frá Kaliforníu samkvæmt heimildum fjölmiðilsins CNN. Einn sérsveitarmaður varð fyrir skoti sem hæfði skothelt vesti hans.
Trump hrósaði leyniþjónustunni og lögregluyfirvöldum fyrir frábært starf og fyrir að hafa brugðist fljótt og vel við aðstæðum í færslu sem hann birti á Truth Social í kvöld. Hann segir að byssumaðurinn hafi verið handtekinn og Trump hafi sagt að dagskráin ætti að halda áfram. Það væri hins vegar lögreglunnar að meta hvort það væri hægt en ef ekki þá yrði kvöldverðurinn bara endurtekinn síðar.
Robert F. Kennedy Jr. heilbrigðisráðherra Bandaríkjanna var meðal gesta á kvöldverðinum. Hér er honum fylgt burt af vettvangi fyrr í kvöld.
Góða kvöldið. Velkomin á fréttavaktina þar sem við fylgjumst með framvindu mála og uppfærum fréttir af skothvellum sem heyrðust á kvöldverði blaðamanna í Washington þar sem Donald Trump og eiginkona hans Melania voru meðal gesta.
Ráðherrar í Bandaríkjastjórn og háttsettir starfsmenn Hvíta hússins voru einnig á þessum árlega kvöldverði blaðamanna Hvíta hússins sem haldinn var á Washington Hilton hótelinu í Washington.
Ég heiti Brynja Dögg Friðriksdóttir og fylgi ykkur á fréttavaktinni í nótt.
