Afganar í Englandi og Wales eru sakfelldir fyrir kynferðisbrot sjö sinnum oftar en Bretar, samkvæmt nýrri greiningu The Economist.
Nick Timothy, skuggadómsmálaráðherra breska Íhaldsflokksins, hefur ítrekað fullyrt að Afganar séu meira en tuttugu sinnum líklegri en Bretar til að fremja kynferðisbrot.
Sjöfaldur munur þrátt fyrir leiðréttingu
Economist byggir á gögnum sem Migration Observatory við Oxford-háskóla fékk frá breska dómsmálaráðuneytinu.
Blaðið skoðaði sakfellingar árin 2020 til 2022 og leiðrétti fyrir aldri og kyni, enda fremja karlar 98 prósent kynferðisbrota og Afganar eru að meðaltali um tíu árum yngri en þjóðin í heild. Niðurstaðan var sjöfaldur munur.
Sama mynstur víðar í Evrópu
Í Austurríki, Danmörku, Finnlandi, Þýskalandi og Svíþjóð eru innflytjendur frá Mið-Austurlöndum, Norður-Afríku, Mið-Asíu og Afríku einnig hlutfallslega fleiri meðal grunaðra og sakfelldra, sérstaklega í kynferðisbrotum.
Alice Weidel, leiðtogi AfD í Þýskalandi, sagði við Economist: „Aðalhópurinn, þegar kemur að verstu glæpunum, eins og nauðgunum, eins og manndrápum eru Sýrlendingar og Afganar.“
Badenoch gerir lítið úr bæklingi
Economist hefur umfjöllun sína á Bristol málinu, þar sem fjórir Afganar voru dæmdir fyrir að nauðga 17 ára stúlku, og bæklingi sem stjórnvöld gáfu út fyrir hælisleitendur. Á fimmtu blaðsíðu hans kom fram að lögaldur til kynlífs væri 16 ár og að nauðgun væri alvarlegur glæpur.
Kemi Badenoch, leiðtogi Íhaldsflokksins, gaf lítið fyrir það: „Ég hef aldrei heyrt um neinn sem ákvað að nauðga ekki vegna þess að hann fékk bækling.“
Ben Brindle hjá Migration Observatory segir að margir innflytjendur hafi orðið vitni að ofbeldi eða komi úr fátækt og að einangrun og atvinnuleysi í Bretlandi bæti ekki úr.
