Margir aðstandendur íbúa á hjúkrunarheimilinu Skjóli eru reiðir eftir að sendur var út póstur þar sem þeir voru beðnir um að sinna garðverkum á heimilinu. Kona sem kvartaði bendir á að móðursystir hennar borgi 600 þúsund krónur á mánuði fyrir að vera þarna og að heimili geti alveg keypt þjónustuna eins og aðrir.
„Mér finnst þetta fyrir neðan allar hellur,“ segir Charlotta Sverrisdóttir eftir að hafa fengið póst frá hjúkrunarheimilinu Skjóli á Kleppsvegi í Reykjavík.
Á hún við póst frá hjúkrunarheimilinu þar sem aðstandendur voru beðnir að mæta á morgun, fimmtudaginn 28. maí, til að sinna ýmsum störfum á heimilinu. Það er sópa, týna rusl, klippa tré, bera á húsgögn, hreinsa stéttar og setja niður blóm. Gott væri að koma með skólfur, sköfur, handska og fleira að heiman. Boðið verður upp á pulsur og drykki í lok dags.
„Nú óskum við eftir ykkar aðstoð kæru ættingjar og vinir að gera fínt fyrir fólkið ykkar fyrir sumarið,“ segir í póstinum.
Varð hissa
Charlotta á 95 ára móðursystur á Skjóli sem hefur verið þar í fimm ár. Hún man ekki eftir að hafa fengið slíkan póst áður.
„Ég hef ekki fengið svona póst áður og varð svolítið hissa,“ segir hún. Finnist henni eins og hjúkrunarheimilið sé að reyna að spara sér kostnað og koma vinnu yfir á aðstandendur. „Við, venjulegt fólk, þurfum stundum að kaupa svona þjónustu. Af hverju gera þeir það ekki sjálfir? Eða fá unglingavinnuna til að gera þetta? Það hlýtur að vera einhver önnur leið,“ segir Charlotta.
Skjól er undir hatti Eirar, sjálfseignarstofnunar. Aðilar Eirar eru Reykjavíkurborg, Mosfellsbær, Seltjarnarnesbær og ýmis stéttarfélög og félagasamtök.
Borgar 600 þúsund á mánuði
Charlotta segir fólk borga 80 prósent af launum sínum fyrir vistina. Móðursystir hennar sé með góðan sjóð eftir sig og eiginmann sinn.
„Hún er að borga núna 600 þúsund krónur á mánuði sem mér finnst alveg svakalega mikið. Þetta er búið að hækka um 100 þúsund krónur á fimm árum,“ segir hún.
Charlotta skrifaði Skjóli póst og sagði beiðnina fyrir neðan allar hellur. Hún segist ekki ætla að mæta á morgun.
„Nei, nei, ég ætla sko ekkert að mæta. Ég er 75 ára gömul og er ekkert að fara að bogra þarna í lóðinni hjá þeim,“ segir hún.
Nískupúkaháttur eða hópefli?
Einnig skrifaði Charlotta færslu um málið á samfélagsmiðlum sem fengið hefur mikil viðbrögð.
„Hvernig væri að fá garðyrkjumenn í garðverkin? Hvurslags nískupúkaháttur er þetta?“ segir ein.
„Það er eitthvað mjög skrítið í gangi með reksturinn á þessu heimili. Þekki ágætlega til bæði fyrr og nú,“ segir önnur.
Ekki eru hins vegar allir sammála. Sumir nefna að þetta sé góð leið til þess að eyða tíma með fólkinu sínu.
„Er þetta ekki bara ágæt leið fyrir aðstandendur til að kynnast ?“ spyr einn maður.
„Hvað er að þessu? Gefur þetta ekki bara góðan anda og aðstandendur kynnast?“ spyr önnur.
