Icelandair segir það að aflýsa hafi þurft fjölda flugferða félagsins að undanförnu, mega rekja til til „samstilltra aðgerða“ flugmanna sem skyndilega hafi hætt að selja frídaga sína, líkt og tíðkast hafi og sé hluti af kjarasamningi þeirra.
Félagið hafnar fullyrðingum formanns Félags íslenskra atvinnuflugmanna (FÍA) alfarið um að flugmenn beri enga ábyrgð á því að aflýsa hafi þurft flugferðum undanfarið vegna mönnunarvanda.
Þetta kemur fram í skriflegu svari Icelandair við fyrirspurn mbl.is, en þar er brugðist við því Jón Þór Þorvaldsson, formaður FÍA, sagði í samtali við mbl.is í dag að flugmenn stæðu allar sínar vaktir og varavaktir.
Ástæðu þess að ítrekað hefði ekki tekist að manna áhafnir véla félagsins síðustu daga, mætti meðal annars rekja til áætlanagerðar og reksturs félagsins. Sagði Jón Þór Icelandair bera alla ábyrgð á því að manna áætlunina. Í gær þurfti að aflýsa sjö flugferðum Icelandair, þar af fjórum vegna þess að ekki tókst að manna áhafnir.
Aldrei áður skapað rekstrarvanda
Icelandair vill ekki meina að svo sé.
„Sveigjanleiki í mönnun, þar á meðal svokallaðir „keyptir dagar“, er hluti af gildandi kjarasamningi og hefur um árabil verið eðlilegur þáttur í rekstri félagsins. Þetta fyrirkomulag er vel þekkt í flugrekstri hérlendis og erlendis,“ segir í svari Icelandair.
Ekki hafi verið hægt að sjá fyrir slíkar breytingar á hegðun flugmanna.
„Þær aflýsingar sem orðið hafa undanfarið vegna áhafnaskorts má rekja til samstilltra aðgerða þar sem flugmenn hafa skyndilega hætt að selja frídaga. Slík staða hefur ekki komið upp frá árinu 2014 og er því verulega frábrugðin því sem félagið hefur mátt byggja á við skipulagningu flugáætlunar.“
Sala frídagana hafi verið reglubundin á liðnum árum og í hverjum einasta mánuði hafi flugmenn selt frídaga sína án þess að það hafi kallað á athugasemdir eða skapað rekstrarvanda.
Breytt hegðun flugmanna sé orsökin
Bent er á að flugmenn fái auk þess verulega greiðslu fyrir slíka daga, sem undirstriki að um gagnkvæmt fyrirkomulag sé að ræða sem hafi gagnast báðum aðilum.
Eins og mbl.is hefur greint frá hafa flugmenn sem bregðast við kalli félagsins um að koma til vinnu á frídögum fengið greitt um 15 prósent af launum sínum. Getur sú upphæð numið allt að 400 þúsund krónum, samkvæmt núgildandi kjarasamningi, samkvæmt heimildum mbl.is.
Í svari Icelandair segir að í ljósi þessa sé ekki hægt að rekja niðurfelldar flugferðir til áætlanagerðar og reksturs, heldur „til breyttrar hegðunar flugmanna sem félagið hafði ekki forsendur til að gera ráð fyrir.“
