Mikill erill var hjá lögreglunni á Akureyri á Bíladögum um helgina. Átta líkamsárásir voru tilkynntar, þar af þrjár alvarlegar, og nokkrir gistu fangageymslur. Þá komu upp fjögur fíkniefnamál og töluvert var um að umferðarlög væru brotin. Lögregluvarðstjóri segir að þetta séu talsvert fleiri brot en á Bíladögum síðustu ár.
„Samanborið við fyrri ár segir mín tilfinning mér að það var svona ívið meira að gera. Það er alltaf erilsamt í kringum Bíladaga. Það er samt ekki bara tengt Bíladögum, það eru margir viðburðir í gangi,“ segir Heimir Heiðarsson, lögregluvarðstjóri á Akureyri. Hann vísar þar til háskólahátíðar og brautskráningar í Háskólanum á Akureyri, reiðhjólamóta sem voru í bænum og þess að ferðamannasumarið sé að nálgast hámark og margir gestir hafi sótt bæinn heim.
Íbúar misánægðir
Nokkuð er um að íbúar kvarti undan gestum á Bíladögum, einkum hávaða af ökutækjum þeirra á götum bæjarins. Samstarf bílaklúbbsins og lögreglu þó til fyrirmyndar, segir Heimir. Kvörtunum hafi farið fækkandi eftir að Bílaklúbburinn fékk aksturssvæði rétt ofan bæjarins. Þar er spólsvæði sem er opið alla nóttina og ökuþórar geti skemmt sér þar í stað þess að vera á götum bæjarsins.
Jónas Freyr Sigurbjörnsson, hjá Bílaklúbbi Akureyrar, segir að viðburðir á vegum klúbbsins hafi gengið vonum framar þótt veðrið hefði mátt vera betra. Alltaf séu nokkrir svartir sauðir meðal gesta en flestir hagi sér þó vel.
„Bíladagar sjálfir gengu mjög vel. Það voru engin læti á viðburðum. Það kom upp eitt mál á spólsvæðinu á föstudagskvöldið þar sem þurfti að kalla til lögreglu. Annað var það nú ekki. Og svo einhverjar smá ryskingar á tjaldsvæðinu en við erum alltaf með hóp manna þar sem ræður nú oftast niðurlögum þess,“ segir Jónas. Um 80 keppendur voru í götuspyrnu, sem var frestað til sunnudags vegna rigningar, og góð aðsókn á alla viðburði Bíladaga.
