Breska hælisleitendakerfið er undir gríðarlegu álagi og samkvæmt nýrri úttekt gæti það tekið allt að 44 þúsund ár að afgreiða uppsafnaðar kærur í núverandi hælisleitendamálum.
Samkvæmt tölum sem breska blaðið The Sun hefur tekið saman eru nú 38.866 hælismál til meðferðar fyrir dómstólum eða á kærustigi. Miðað við núverandi afgreiðsluhraða myndi það taka kerfið tugþúsundir ára að klára málin öll.
Meðalbiðtími eftir niðurstöðu í kæru hefur farið upp í 14 mánuði á síðustu tveimur árum.
Þetta er raunin þrátt fyrir að ríkisstjórn Verkamannaflokksins hafi lofað að herða tökin á ólöglegum innflytjendum og „brjóta glæpagengin á bak aftur“ sem standa að smygli fólks yfir Ermarsund.
87 þúsund til viðbótar
Tölurnar ná þó aðeins til hluta vandans. Þar fyrir utan bíða yfir 87 þúsund kærur sem tengjast synjuðum hælisumsóknum og hafa verið lagðar fram fram til aprílmánaðar á þessu ári. Það er 70 prósenta aukning milli ára.
Kostnaður breskra skattgreiðenda bara vegna kærukerfisins í innflytjenda- og hælisleitendamálum er sagður nema um 80 milljónum punda, eða 14 milljörðum króna, á ári.
London og Manchester verst stödd
Úttektin bendir á að dómstólar í London og Manchester séu verst staddir hvað tafir varðar.
Við Taylor House í London er uppsafnaður málafjöldi sagður samsvara 10.888 ára bið, en við Manchester Piccadilly er talan 7.412 ár.
Íhaldsþingmaðurinn Sir Alec Shelbrooke segir kerfið algjörlega óstarfhæft.
„Þetta er algjörlega óskilvirkt kerfi. Þangað til við förum út úr Mannréttindasáttmála Evrópu getum við ekki breytt þessu,“ sagði hann.
Hann gagnrýndi jafnframt það sem hann kallaði „aktívista-lögmenn“ sem hafi fjárhagslegan ávinning af því að kærumál dragist á langinn.
Ríkisstjórnin hafnar túlkuninni
Talsmaður bresku ríkisstjórnarinnar hafnaði þó þessari túlkun á tölunum og sagði stjórnvöld hafa náð „umtalsverðum árangri“ við að stytta biðlista.
Samkvæmt ríkisstjórninni hefur fjöldi þeirra sem bíða eftir fyrstu niðurstöðu í hælismáli lækkað um 72 prósent, úr hámarki sem nam 175 þúsund manns undir fyrri ríkisstjórn.
Innanríkisráðherrann hefur jafnframt boðað víðtækar breytingar á innflytjendakerfinu sem eiga að hraða kærumeðferð og auðvelda brottvísanir þeirra sem ekki hafa rétt til dvalar.
