Árni Sverrisson, formaður Félags skipstjórnarmanna, kallar eftir því að íslensk stjórnvöld grípi þegar í stað í taumana og komi í veg fyrir að aðgerðasinninn Paul Watson og samtök hans nái að trufla hvalveiðar við Ísland í sumar. Landhelgisgæslan eigi að hindra Watson í að koma nálægt skipum sem séu við löglegar veiðar.
„Lögreglan á hafinu verður að bregðast við“
Árni segir það óásættanlegt að aðili sem lýsir yfir áformum um að stöðva löglega starfsemi fái að nálgast skipin óáreittur. Hann telur að grípa eigi til aðgerða áður en til átaka kemur.
„Okkur sjómönnum er einfaldlega nóg boðið,“ segir Árni og bendir á að 28 sjómenn á hvalveiðiskipunum sæti því að komið sé fram við þá eins og glæpamenn. Hann segir alvarleikann mikinn fyrir áhafnirnar, sérstaklega í ljósi hótana um að sprengja skipin. Hann hvetur stjórnvöld til að fylgja fordæmi Færeyinga og hreinlega snúa skipi Watsons við.
Árni gagnrýnir samtök Watsons harðlega og kallar hópinn „atvinnumótmælendur“ sem séu kostaðir af ríku listafólki sem hafi enga hagsmuni af málinu.
Hann telur að umræðan um hvalveiðar einkennist af upphrópunum og þöggun gagnvart atvinnugreininni, en hún eigi að byggjast á vísindalegri þekkingu og staðreyndum.
Hvalirnir éta mörg milljón tonn
Árni dregur fram tölur máli sínu til stuðnings og bendir á að hvalir í Norður-Atlantshafi éti mörg milljón tonn úr lífríki sjávar árlega.
Erfitt er að áætla nákvæmlega hvað hvalir á Íslandsmiðum éta mikið á ári en í skýrslu frá Hagfræðistofnun Háskóla Íslands fyrir Landbúnaðar- og sjávarútvegsráðuneytið (2010) var áætlað að tólf hvalategundir á Íslandsmiðum og nærliggjandi svæðum éti samtals um 6,3 milljónir tonna á ári.
Í skýrslu Eddu Elísabetar Magnúsdóttur, lektors í líffræði við Háskóla Íslands, fyrir matvælaráðuneytið, „Hvalir í vistkerfi sjávar“ (2023), kemur fram að öll sjávarspendýr innan íslenskrar lögsögu neyti um níu sinnum meira en íslenski sjávarútvegurinn veiðir. Aftur á móti neyti sjávarspendýr að langmestu leyti fæðu úr neðri þrepum vistkerfa sjávar, sem sjávarútvegurinn nýtir í litlu magni, eins og átu og smærri uppsjávarfiska.
Til samanburðar voru aflaheimildir íslenska flotans fiskveiðiárið 2025–2026 tæp 700 þúsund tonn samkvæmt Fiskistofu.
Árni leggur áherslu á að þetta snúist um Ísland sem þjóð og réttinn til að nýta auðlindir sjávar.
