Mjótt er á munum fyrir þjóðaratkvæðagreiðslu um framhald viðræðna við Evrópusambandið, samkvæmt þjóðarpúlsi Gallups.
Alls segjast 52 prósent þeirra sem taka afstöðu ætla að segja já við viðræðum en 48 prósent nei.
Þeir sem ætla að segja já eru aðeins vissari í sinni sök. Þannig segjast 39 prósent örugglega ætla að segja já, en 13 prósent segjast líklega ætla að segja já.
Á móti segjast 35 prósent örugglega ætla að segja nei, en 13 prósent líklega.
Hér eru þeir sem taka ekki afstöðu undanskildir og sama gildir um greininguna hér að neðan.
Mestur stuðningur hjá ungu fólki og fólki á fimmtugsaldri
Mestur er stuðningur við viðræðurnar meðal fólks undir þrítugu. Í þeim aldurshópi segjast 63% ætla að segja já en 37% nei. Næstmestur er stuðningurinn í aldurshópnum 40–49 ára eða 61%.
Minnstur er stuðningurinn þó meðal fólks á fertugsaldri, eða 42%, en þar segjast 58% ætla að greiða atkvæði gegn viðræðum.
Sé litið til menntunar, segjast 68% fólks með háskólapróf ætla að segja já. Meðal þeirra sem hafa aðeins lokið grunnskóla- eða framhaldsskólaprófi ætla aðeins 45% að segja já.
Meirihluti meðal kjósenda Samfylkingar, Viðreisnar, Flokks fólksins og VG
Það kemur sennilega fáum á óvart að mestur stuðningur við viðræðurnar sé meðal kjósenda Viðreisnar (98%) og Samfylkingarinnar (90%).
Aðildarviðræðurnar njóta hins vegar einnig stuðnings meirihluta kjósenda Vinstri grænna (82%) og Flokks fólksins (60%). Báðir flokkar eru þó andvígir aðild að Evrópusambandinu.
Meðal kjósenda Framsóknarflokksins ætla 26% að segja já, en 74% nei. Þá ætla 16% kjósenda Sjálfstæðisflokks að segja já, en 84% nei.
Andvígastir viðræðum eru kjósendur Miðflokksins, en aðeins níu prósent ætla að greiða atkvæði með viðræðum.
Af þeim sem segjast styðja ríkisstjórnina ætla 86% að segja já en 14% nei. Meðal þeirra sem styðja ekki ríkisstjórnina ætla hins vegar 19% að segja já en 81% nei.
Niðurstöður könnunarinnar eru í takt við könnun Maskínu frá því fyrr í mánuðinum. Þar sögðust 53% af þeim sem tóku afstöðu ætla að segja já en 47% nei.
