Grímur Grímsson þingmaður Viðreisnar er þeirrar skoðunar að tilefni sé til þess að endurskoða ákvæði almennra hegningarlaga um hryðjuverk.
Morgunblaðið ræddi við Grím um dóm Landsréttar í hryðjuverkamálinu svokallaða sem féll fyrir helgi þar sem Sindri Snær Birgisson og Ísidór Nathansson voru sýknaðir af ákæru vegna tilraunar til hryðjuverka. Þeir voru þó sakfelldir fyrir stórfelld vopnalagabrot.
Grímur var yfirlögregluþjónn hjá rannsóknardeild lögreglunnar á höfuðborgarsvæðinu þegar rannsókn á málinu hófst. Í dómnum segir að við upphaf rannsóknar lögreglu hafi ýmislegt komið fram sem ekki gaf raunsanna mynd af málinu. Meðal annars hafi fréttatilkynning ríkislögreglustjóra vegna málsins verið villandi.
Helgi Gunnlaugsson afbrotafræðingur velti því upp í viðtali við mbl.is fyrir helgi hvort lögregla hefði farið offari þegar hún réðst í handtökur á mönnunum í september 2022. Í ljósi niðurstöðu dómsins hefðu aðrar aðferðir dugað til, til dæmis með því að fylgjast lengur með ferðum þeirra og samskiptum.
„Allar aðgerðir orka auðvitað tvímælis en þarna hefur mat ríkislögreglustjóra verið þannig að það þyrfti að grípa inn í á þessum tíma. Það er svo örugglega auðvelt að gagnrýna það með allar upplýsingar eftir á,“ segir Grímur, spurður út í það hvort hann telji að lögregla hafi farið offari.
Segist Grímur eiga von á því að verklag hafi verið rýnt hjá öllum þeim aðilum sem komu að rannsókn málsins, lögreglunni á höfuðborgarsvæðinu, ríkislögreglustjóra og héraðssaksóknara, og að ef slíkt mál kæmi upp aftur væri hægt að horfa til reynslunnar sem fékkst við rannsókn þessa máls.
Grímur telur brýnt að ákvæði hegningarlaga er varða hryðjuverk verði endurskoðuð. „Ég ætla ekkert endilega að meta það sjálfur hvort það eigi að breyta lögum til þess að þau nái utan um svona brot en ég held að það sé klárt tilefni til þess að taka það til skoðunar hvort það þurfi að breyta þessum kafla hegningarlaga.“
Grímur segist ekki sjálfur ætla að beita sér fyrir því á Alþingi að ákvæðin verði endurskoðuð. Sú vinna þurfi að fara fram hjá dómsmálaráðuneytinu en ekki að frumkvæði alþingismanns.
Hryðjuverkaákvæðið, sem Sindra og Ísidóri var í ákæru gefið að sök að hafa brotið gegn, hafði ekki áður komið til kasta dómstóla. Helst hefur reynt á það fyrir dómstólum hvort þeir hafi ótvírætt sýnt ásetning til hryðjuverka í verki, sem er forsenda sakfellingar fyrir tilraunarbrot.
Málinu loksins lokið?
Ákvörðun ekki tekin
Sigríður Friðjónsdóttir ríkissaksóknari segir í skriflegu svari við fyrirspurn Morgunblaðsins að ekki hafi enn verið tekin ákvörðun um það hvort óskað verði eftir áfrýjunarleyfi til Hæstaréttar í málinu. Ákæruvaldið hefur fjórar vikur til að áfrýja málinu til æðsta dómstigs landsins.
Hæstiréttur hefur áður tekið málið til meðferðar en í mars ómerkti dómstóllinn fyrri sýknudóm Landsréttar.
Fáðu þér áskrift til að lesa áfram
Þú ert innskráð(ur) sem ... en ert ekki með áskrift.
Aðgangur að þessari frétt í fullri lengd krefst áskriftar að Morgunblaðinu,
rafræns aðgangs á borð við vikupassa eða séráskriftar að viðkomandi efnisflokki
á mbl.is.
