Með íslenskum jarðvarma væri hægt að sjá allri Evrópu fyrir sjálfbæru þotueldsneyti. Þetta segja frumkvöðlar sem gera um þessar mundir tilraunir með framleiðslu vetnis á Húsavík. Icelandair hefur áhuga á verkefninu.
Ótakmarkað eldsneyti - að eilífu. Þetta var yfirskrift kynningar bandaríska fyrirtækisins Syntholene Energy, fyrir fjárfesta og aðra sem hafa áhuga á stórhuga áformum þeirra á Íslandi.
„Syntholene fæst við að framleiða há-orku, kolefnishlutlaust og ódýrt efnaeldsneyti sem einnig kallast e-eldsneyti. Við getum framleitt samskonar jarðeldsneyti, sem við nú nýtum jarðefnaeldsneyti til að framleiða, en við getum framleitt þau með eingöngu vetni og kolefni frá grænni orku, einkum frá ríkulegri grænni jarðvarmaorku Íslendinga,“ segir Dan Sutton, framkvæmdastjóri Syntholene.
Og þeir spöruðu ekki stóru orðin - tæknin gæti bylt eldsneytisbransanum á heimsvísu og meira af eldsneyti gæti verið flutt út frá Íslandi en af jarðgasi frá Noregi.
Og eftir um áratugar undirbúning, tók rétt um tvo mánuði að byggja tilraunastöð á Húsavík.
Í rafgreini er vetni búið til, sem er lykilhráefni í framleiðslu sjálfbærs eldsneytis, eða e-fuels, en það er framleitt víða um heim með misumhverfisvænum hætti. Vetninu er svo blandað við endurnýtt kolefni og hefðbundið eldsneyti.
Markmið Syntholene er að gera framleiðsluna bæði ódýrari og umhverfisvænni en þekkist annars staðar.
Bandaríkjamönnunum var bent á að á Húsavík væri um þessar mundir nóg af orku að fá frá Þeistarreykjum, á meðan vinnsla PCC liggur niðri.
Hvort eldsneytisvinnslustöð rís við Skjálfanda á næstu árum, eða annars staðar á landinu, á svo eftir að koma í ljós.
„Næst liggur fyrir að reisa stóra verksmiðju, væntanlega hér. Þar sem við getum framleitt eldsneyti fyrir markaðinn á Íslandi, og mögulega fyrir Icelandair, sem hefur ýjað að því að vilja vera meðal fyrstu viðskiptavina okkar. Og hugsanlega dísilolíu fyrir fragtskipaflotann og aðra hér innanlands. Svo það eru stór áform og margar hendur þarf til að láta þetta gerast,“ segir Dan Sutton.
