Áætlað er að skera fjárveitingar til framhaldsskóla niður um 7,1% á næstu árum. Fjárhagsstaða skólanna hefur verið þröng og af 27 ríkisreknum framhaldsskólum voru 22 reknir með halla árið 2024. Samanlagt eigið fé allra framhaldsskóla var jákvætt um tæpan milljarð 2019 en neikvætt um rúman milljarð 2024. Staðan batnaði 2025 þegar skólarnir fengu viðbótarfé á aukafjárlögum.
„Þetta er bara kyrkingartak sem er verið að setja á framhaldsskóla í landinu núna, að þeir eigi að spara upphæðir sem við höfum ekki séð áður, ekki einu sinni eftir hrunið. Þarna er verið að skafa innan úr skólunum, við erum að taka sálina úr skólunum,“ segir Guðjón Hreinn Hauksson, formaður Félags framhaldsskólakennara.
Sameining ólíkleg
Guðjóni þykir ólíklegt að framhaldsskólar verði sameinaðir. Tillögur þar um fengu engan hljómgrunn fyrir nokkrum árum þegar meðal annars stóð til að sameina Menntaskólann og Verkmenntaskólann á Akureyri. Fyrirhugaður niðurskurður muni aðallega bitna á þjónustu sem skólarnir veita.
„Það að hér sé verið að leggja niður bókasöfn. Það er verið að skera niður stoðþjónustu. Það er verið að skera niður námsbrautir. Þetta er ekki boðlegt fyrir nemendur í landinu og alls ekki fyrir foreldra og samfélagið allt,“ segir Guðjón bendir á að fjárveitingum til skólanna sé misskipt. „Það er dálítið áhugavert að þessir skólar sem voru nefndir í gær eru á mjög góðum stað fjárhagslega. Það þýðir að stjórnvöld eru að skammta þessum skólum miklu meira fé en öðrum skólum sem eru í rauninni mun ódýrari í rekstri,“ segir Guðjón og vitnar til fréttar um há laun ríkisstarfsmanna.
