Aukin skattheimta á fjármálafyrirtæki, sem boðuð er í fjármálaáætlun fyrir árin 2027-2031, gæti valdið því að virði viðskiptabankanna lækki um tugi milljarða króna.
Þetta kemur fram í nýrri greiningu sem unnin var af greiningarfyrirtækinu IFS greiningu.
Samkvæmt dagskrá Alþingis verða greidd atkvæði um tillögu Daða Más Kristóferssonar, fjármála- og efnahagsráðherra, á þingfundi í dag en hvergi kemur þó fram í tillögunni hve miklu skattahækkunin eigi að skila ríkissjóði. Þórður Snær Júlíusson, framkvæmdastjóri þingflokks Samfylkingarinnar, hefur þó áður fullyrt í skrifum sínum að skattahækkunin eigi að skila ríkissjóði um sex milljörðum á ári.
Bankaskatturinn er í dag reiknaður sem 0,145% af bókfærðum skuldum fjármálafyrirtækja en í greiningunni kemur fram að ef ætlunin sé að auka skattheimtuna um sex milljarða þurfi að hækka prósentuna upp í 0,269%.
Telur IFS greining að ef hækkunin yrði svo mikil myndi virði bankanna lækka um í kringum fjögur prósent. Þannig myndi virði Landsbankans lækka um 17,4 milljarða, virði Íslandsbanka myndi lækka um 12,4 milljarða og virði Arion banka sömuleiðis en gert er ráð fyrir að virði Kviku banka myndi lækka um 2,6 milljarða. Telur greiningarfyrirtækið því heildaráhrif aukinnar skattheimtu á virði bankanna fjögurra vera 44,9 milljarðar króna en eins og áður segir hefur því verið haldið fram að skattahækkunin muni skila ríkissjóði um sex milljörðum króna á ári.
Hlutur ríkisins lækkar í virði
Samtök fyrirtækja í fjármálaþjónustu stóðu fyrir fundi um skattahækkunina í síðustu viku í Háskóla Íslands, nánar tiltekið í Veröld, húsi Vigdísar, en þar birti ráðgjafarfyrirtækið Intellecon samantekt, þar sem fram kom að ríkissjóður ætti um 40% af viðskiptabönkunum í gegnum hlut sinn í Landsbankanum og að lífeyrissjóðir og einstaklingar ættu því til viðbótar önnur 40% í bönkunum.
Út frá forsendum Intellecon má því ætla að hlutur ríkisins í bönkunum muni lækka um 17 milljarða ef til skattahækkunarinnar kemur. Hlutur lífeyrissjóða myndi þá lækka um 13 milljarða og hlutur einstaklinga um 4,5 milljarða til viðbótar.
Sérstakir bankaskattar hér á landi eru þegar margfaldir á við það sem þekkist í nágrannaríkjum Íslands.
Fáðu þér áskrift til að lesa áfram
Þú ert innskráð(ur) sem ... en ert ekki með áskrift.
Aðgangur að þessari frétt í fullri lengd krefst áskriftar að Morgunblaðinu,
rafræns aðgangs á borð við vikupassa eða séráskriftar að viðkomandi efnisflokki
á mbl.is.
