Seðlabanki Bandaríkjanna hækkaði stýrivexti í gær, fyrsta sinni síðan árið 2023 og vakti þannig reiði Bandaríkjaforseta. Donald Trump forseti hafði krafist þess að vextir yrðu lækkaðir en seðlabankastjórinn Kevin Warsh sagði brýnt að takast á við verðbólgu sem hefði verið of mikil og varað allt of lengi.
Því hefði verið nauðsynlegt að taka þá alvarlegu ákvörðun að hækka vexti. Peningastefnunefnd bankans ákvað einróma að hækka vextina um 25 punkta þannig að þeir verða milli 3,75 og fjögur prósent. Nefndinni þykir líklegt að vextir þurfi að hækka einu sinni enn fyrir árslok í ljósi efnahagsspár.
Trump brást ókvæða við og sagði peningastefnunefndina fjandsamlega í sinn garð, vaxtahækkuninni væri beint gegn honum sjálfum og í pólitískum tilgangi.
Hann lét þó eiga sig að móðga Warsh persónulega eða gagnrýna hann líkt og iðulega gagnvart forveranum Jeremy Powell, sem honum fannst ekki hafa nægilega snör handtök við vaxtalækkanir.
Forsetinn fyrirskipaði sakamálarannsókn á starfsháttum Powells í tengslum við endurbætur á húsnæði Seðlabankans. Bandarískur almenningur og fyrirtæki hafa glímt við verðbólgu talsvert yfir markmiðum undanfarin ár og Íransstríðið og tollar Trumps hafa orðið til þess að vöruverð hefur hækkað talsvert.
