Nítján ára gamall Þjóðverji hefur vakið mikla athygli á samfélagsmiðlum nýlega eftir að hann birti mynd af opinberri tilkynningu frá þýskum lögregluyfirvöldum þar sem fram kom að hann hefði verið til rannsóknar fyrir að móðga þáverandi kanslara Þýskalands, Olaf Scholz.
Samkvæmt frásögn unga mannsins byrjaði málið þegar hann var að hala niður tölvuleiknum Fortnite og niðurhalið virtist festast í þremur prósentum. Hann tók þá skjáskot af stöðunni og birti það á X og skrifaði í gríni:
„Olaf Scholz, fanturinn þinn, hvað á þetta rugl að þýða?“
Nokkru síðar barst tilkynning frá lögreglu þar sem fram kom að færslan væri til rannsóknar. Ungi maðurinn segir móður sína hafa vakið sig með látum til að sýna honum bréfið en að hann hafi sjálfur hlegið að málinu. Hann tekur fram að hann hafi hvorki þá né nú haft neitt sérstakt á móti Scholz.
Samkvæmt honum skipuðu yfirvöld honum að eyða færslunni og móðir hans vildi ekki að hann ræddi rannsóknina opinberlega. Nú hafi hann hins vegar flutt úr landi og ákveðið að birta mynd af bréfinu ári síðar.
Hert lög um móðganir gegn stjórnmálamönnum
Málið hefur vakið mikla umræðu, ekki síst vegna þess að sambærileg mál hafa komið upp í Þýskalandi á síðustu árum.
Árið 2021 voru þýsk lög hert þannig að sérstaklega refsivert varð að móðga stjórnmálamenn. Um leið fengu saksóknarar auknar heimildir til að hefja málarekstur án þess að viðkomandi stjórnmálamaður þyrfti sjálfur að leggja fram kæru.
Eitt þekktasta dæmið er svokallað „Schwachkopf“ mál frá árinu 2024 þar sem lífeyrisþegi í Bæjaralandi birti grínmynd af þáverandi varakanslara, Robert Habeck, og kallaði hann fávita. Í kjölfarið gerði lögregla húsleit á heimili mannsins, lagði hald á tölvubúnað og sektaði hann um 1.350 evrur.
Fyrr á þessu ári hófst einnig rannsókn á eldri borgara í Heilbronn sem hafði kallað Friedrich Merz „Gosa“ í athugasemd á Facebook.
Þá fylgdu 60 mínútur þýskri lögreglu eftir meðan hún leitaði að manni sem hafði kallað þingkonu ‚hlussu‘.
Snorri Másson gagnrýnir þróunina
Snorri Másson fjallaði um málið á sínum samfélagsmiðlum.
Í færslu sinni gagnrýnir hann harðlega þróunina í Evrópu og segir hana fela í sér misnotkun á hugtakinu mannréttindi og aukna tilhneigingu stjórnvalda til að kæfa pólitíska umræðu undir því yfirskini að verið sé að vernda fólk gegn hatri eða móðgunum.
Snorri segir jafnframt að sambærileg orðræða hafi færst inn í íslensk stjórnmál þar sem pólitískar skoðanir séu í auknum mæli skilgreindar sem mannréttindi og andstæð sjónarmið því sett fram sem andstaða við mannréttindin sjálf.
Að lokum tengir hann þróunina við gagnrýni sína á Evrópusambandið og segir að stjórnmálastétt innan sambandsins hafi byggt upp ofurskrifræðislegt og ólýðræðislegt kerfi sem sé í vaxandi mæli farið að grafa undan tjáningarfrelsi og lýðræðislegri umræðu.
