Nokkuð er um að erlendir ferðamenn þurfi að breyta áætlunum sínum og afbóka ferðir hér á landi vegna tafa í vegabréfaeftirlitinu í Leifsstöð. Framkvæmdastjóri ferðaþjónustufyrirtækis segir fyrirtæki sitt bera kostnað og óþægindi vegna þessa.
Ferðamenn frá löndum utan Schengen lýsa óförum sínum á Keflavíkurflugvelli og langri bið í landamæraeftirlitinu á fjölmörgum spjallþráðum á samfélagmiðlum.
Og þessi bið hefur talsverð áhrif á ferðaþjónustuna segir Hallgrímur Lárusson, framkvæmdastjóri ferðaþjónustufyrirtækisins Snælands Grímssonar, sem meðal annars sækir ferðamenn á flugvöllinn og ekur þeim á ýmsa staði.
Úr 45 mínútum í þrjá tíma
„Venjulega tekur svona 45 mínútur fyrir fólk að fara í gegnum flugvöllinn þegar allt gengur vel. En núna hefur þetta verið upp í þrjá tíma þegar verst hefur látið,“ segir Hallgrímur.
Lögreglufulltrúi á Suðurnesjum sagði í hádegisfréttum útvarps að nýtt fyrirkomulag vegna ferðamanna utan Schengen-svæðisins hefði lengt tímann sem vegabréfaeftirlitið tekur úr 15 sekúndum upp í allt að eina og hálfa mínútu.
Sjálfsafgreiðsluvélar, sem voru settar upp í komusal flugvallarins, hafa ekki virkað sem skyldi og eru ekki í notkun.
Margvísleg áhrif
Hallgrímur segir að þessi langi tími sem líður frá því að flugvél lendir og fólk kemst úr flugstöðinni hafi margvísleg áhrif á ferðaþjónustuna og riðli áætlunum fólks. „Það ætlar kannski að fara í Bláa lónið tveimur tímum eftir að það lendir. Það missir kannski af tímanum sínum þar, eða er búið að gera aðrar ráðstafanir með ferðir og annað slíkt sem fer í vaskinn.“
Er fólk þá að missa af því sem það var búið að bóka og greiða fyrir? „Já.“
Er þetta fólk sem er að stoppa stutt á Íslandi? „Það er allur gangur á því. Þetta er mikið fólk sem er að fara um borð í skemmtiferðaskip.“
Hefur þetta haft áhrif á ykkar rekstur? „Já, það er mikið að gera. Það er háönn í ferðaþjónustunni og við þurfum að skipuleggja okkar dag mjög vel. Það er verið að setja tækin þannig að tímarnir gangi upp. Og það riðlar mjög miklu þegar einhver þarf að bíða í tvo tíma í Keflavík eftir einhverjum aðila sem hann á að sækja.“
Svo líða bara klukkutímar...
Auk þessa hefur fyrirtæki Hallgríms borið talsverðan kostnað af þessum töfum sem að hluta til er tilkominn vegna hárra stöðugjalda við Leifsstöð. „Menn hafa alltaf fylgst með hvort töskur séu komnar á beltið en nú skilst mér að töskurnar fari á beltið og svo líða bara klukkutímar og enginn kemur.“
Hefur þetta verið svona áður? „Ég man ekki eftir að þetta hafi verið svona slæmt áður.“
