Þrír létust í skotárás sem átti sér stað í gyðingahverfi í Montreal í dag. Þeir látnu voru lögreglumaður, íbúi á svæðinu og meintur árásarmaður.
Ekki liggur fyrir hvert tilefni árásarinnar var, en hún átti sér stað á svæði þar sem finna má kosher-veitingastaði og stórmarkaði sem stórt samfélag gyðinga í Montreal sækir mikið í.
„Það er með gríðarlegri sorg sem við staðfestum fall eins lögreglumanns okkar við skyldustörf,“ sagði lögreglan í Montreal í yfirlýsingu á samfélagsmiðlinum X.
Í annarri yfirlýsingu tilkynnti lögreglan að grunaður maður og íbúi hefðu verið drepnir, og hvatti hún jafnframt íbúa til að forðast svæðið.
Ríkisútvarpið Radio Canada greindi frá því að annar lögreglumaður hefði særst alvarlega.
The Centre for Israel and Jewish Affairs (CIJA), áhrifamikil kanadísk borgarasamtök, sögðust fylgjast náið með stöðunni.
„Á meðan við bíðum eftir frekari upplýsingum um eðli þessa skelfilega atviks, hvetjum við meðlimi samfélagsins til að sýna aðgát,“ sagði í yfirlýsingu CIJA.
Almannavarnaráðherra Quebec, Ian Lafreniere, hvatti fólk til að vera ekki á ferli.
„Við erum á vettvangi og verið er að virkja viðbragðsstjórn,“ sagði Lafreniere við fréttamenn. „Sem stendur vitum við hreinlega ekki hver hvatinn á bak við verknað þessa einstaklings var,“ bætti hann við.
