Birtur hefur verið, með fundargerð bæjarstjórnar Vestmannaeyja, ráðningarsamingur sem gerður hefur verið við Írisi Róbertsdóttur sem ráðin var til að gegna áfram starfi bæjarstjóra. Íris hefur verið bæjarstjóri síðan árið 2018 en sú breyting varð á eftir síðustu kosningar að nú er hún ekki lengur einnig kjörinn fulltrúi í bæjarstjórn heldur aðeins ráðin í starfið af meirihluta bæjarstjórnar. Ráðningarsamningur Írísar er byggður upp á nokkuð svipaðan hátt og ráðningarsamningur Berglindar Óskar Guðmundsdóttur bæjarstjóra á Akureyri en Íris fær hins vegar lægri laun í dagvinnu og ekki er hægt að ráða fyllilega af hennar samningi hver heildarlaun hennar á mánuði verða.
Berglind fær 1,8 milljónir í dagvinnulaun á mánuði og ofan á þau leggst 45 prósent stjórnendaálag, 811.851 króna.
Þetta er nýr bæjarstjóri á Akureyri með í laun – Bærinn greiðir fyrir líftryggingu
Grunnlaun Írisar fyrir dagvinnu nema hins vegar 826.344 krónum á mánuði, en þar að auki fær hún greitt fyrir 65 klukkustundir á mánuði í ómælda yfirvinnu á vegum Vestmannaeyjabæjar og stofnana hans. Grunnlaun og greiðslur vegna yfirvinnu skulu taka sömu almennu launabreytingum og hjá öðrum starfsmönnum Vestmannaeyjabæjar.
Hverjar eru yfirvinnugreiðslurnar?
Hver upphæðin fyrir hverja klukkustund í yfirvinnu er kemur hins vegar ekki fram og ekki er vísað í ákvæðinu um yfirvinnunna hvort miðað sé við einhvern ákveðinn kjarasamning en sé miðað við kjarasamning bæjarins við starfsmannafélag Vestmannaeyjabæjar þá fara yfirvinnugreiðslur eftir því á hvaða tíma dags yfirvinnan er unnin og þá er hún ákveðið hlutfall af tímakaupi í dagvinnu. Um forstöðumenn stofnana bæjarins segir að þeir eigi ekki rétt á yfirvinnugreiðslum en sé yfirvinna nauðsynleg skuli semja við þá um sérstaka þóknun fyrir yfirvinnuna. Hvort þetta á við bæjarstjórann er óljóst.
Íris á síðan til viðbótar að fá greidda mánaðarlega sömu þóknun og kjörnir aðalfulltrúar í bæjarstjórn, bæjarráði og ráðunum fjórum sem myndi meginhluta stjórnkerfis Vestmannaeyjabæjar og stofnana. Heildarþóknun fyrir þetta sé samtals 40 grunneiningar á mánuði. Hver grunneining nemi 20.844 krónum. Þessi upphæð nemur því 833.760 krónum á mánuði. Til samanburðar má nefna að Berglind Ósk, bæjarstjóri á Akureyri, fær engar sérstakar greiðslur fyrir setu í nefndum og ráðum og ekki heldur greiðslur sem taka mið af því sem kjörnir fulltrúar fá greitt fyrir slíkt en hún er oddviti Sjálfstæðisflokksins í bæjarstjórn.
Heildarlaun Írisar á mánuði eru því að minnsta kosti 1.660.104 krónur á mánuði en eins og áður segir bætist fasta yfirvinnan við það og erfitt er að átta sig hvað hún fær greitt fyrir hana.
Annað
Fyrir utan sjálf launin fær Íris greiddan bifreiðastyrk fyrir afnot af eigin bifreið í þágu starfs síns.
Bifreiðastyrkur skal nema 950 kílómetrum á mánuði og skal greiðslan vera í samræmi við reglur
ferðakostnaðarnefndar ríkisins. Samkvæmt reglunum er almennt aktursgjald 150 krónur á hvern kílómetra og er þá í tilfelli Írisar samtals 142.500 krónur á mánuði.
Vestmannaeyjabær fer aðra leið í þessum efnum en Akureyrarbær sem greiðir sínum bæjarstjóra fyrir akstur vegna starfs síns samkvæmt akstursdagbók.
Bærinn leggur til og greiðir allan afnotakostnað af farsíma Írisar og sama gildir um afnotagjöld vegna tölvutenginga og heimasíma á heimili hennar. Athygli vekur að þar er ekki gerður greinarmunur á milli notkunar vegna bæjarstjórastarfsins og notkunar sem hefur ekkert með starfið að gera.
Í ráðningarsamningnum segir enn fremur að Íris hafi heimild til stunda endurmenntun og starfstengt nám svo lengi sem það skarist ekki við störf eða skyldur hennar sem bæjarstjóra. Vestmannaeyjabær
greiði í slíkum tilvikum námskeiðsgjöld og kostnað við námsgögn hlutaðeigandi námskeiða.
Vestmannaeyjabær tryggir einnig og greiðir iðgjöld vegna slysa- og sjúkratrygginga bæjarstjórans en útvegar hins vegar ekki líftryggingu eins og Akureyrarbær gerir með sinn bæjarstjóra.
Ráðningarsamningurinn gildir til loka kjörtímabilsins en segi Íris honum upp fyrir þann tíma eða ef bæjarstjórn gerir það þá fær hún greidd laun í sex mánuði en af þessum sex þarf hún að gegna skyldum bæjarstjóra í tvo mánuði, fari bæjarstjórn fram á það.
Umdeild
Ekki var eining í bæjarstjórn um að Íris yrði áfram bæjarstjóri. Sjálfstæðisflokkurinn, sem náði hreinum meirihluta, hafði gefið það upp fyrir kosningar að hún væri bæjarstjórnarefni flokksins og samþykkti ráðninguna. Fulltrúar Eyjalistans sátu hins vegar hjá en Miðflokkurinn var á móti.
Í bókun bæjarfulltrúa Miðflokkins segir:
„Að mati bæjarfulltrúa Miðflokksins er nú tímabært að ráðast í breytingar, ekki aðeins í skipan bæjarstjórnar heldur einnig í embætti bæjarstjóra. Undanfarið hafa komið fram fréttir af slæmum starfsanda og framkomu gagnvart starfsfólki. Þær upplýsingar falla að þeim áhyggjum og þeim orðrómi sem heyrst hefur um þó nokkurt skeið. Við teljum því ekki rétt að halda áfram á sömu braut. Við teljum að sveitarfélagið þurfi nýja forystu sem getur byggt upp traust, eflt samstarf og skapað jákvætt starfsumhverfi til framtíðar. Af þeim sökum getum við ekki stutt ráðningu bæjarstjóraefnis Sjálfstæðisflokksins og leggjum þess í stað til að Trausti Hjaltason verði ráðinn bæjarstjóri.“
Þarna vísa bæjarfulltrúarinnar væntanlega í ásakanir fyrrum starfsmanns bæjarins sem starfað hefur innan flokksins en viðkomandi hefur sakað Írisi um að hafa hrekið sig á brott úr starfi og síðan séð til þess að hún missti það starf sem hún var ráðin í eftir það, hjá einkafyrirtæki. Páll Magnússon fyrrum forseti bæjarstjórnar og félagi Írisar í framboðinu Fyrir Heimaey, sem var í meirihluta frá 2018 og þar til nú að loknum síðustu kosningum, segir þessar ásakanir hins vegar vera þvætting.
