Tveir erlendir ferðamenn sem staðnir voru að utanvegaakstri á Emstruleið virðast ekki hafa látið segjast þegar höfð voru afskipti af þeim, en annar leiðsögumaður hafði áður gómað þá við sama athæfi nálægt Kötlu.
Fyrr í dag var fjallað um tvo erlenda menn sem staðnir voru að utanvegaakstri á Emstruleið, frá Einhyrningi og inn að Álftavatni. Þar hafði trússarinn Klemenz Geir Klemenzson afskipti af mönnunum sem hann taldi vera franska.
„Yppti bara öxlum“
Í samtali við mbl.is segist Margrét Herborg Nikulásdóttir ökuleiðsögumaður hafa verið að snúa aftur með hóp ferðamanna úr íshellaferð við Kötlu þegar hún sá tvo jeppa komna út af slóða.
Þá hafði einum þeirra tekist að festa sig í holu við aksturinn. Slíkar holur geta verið stórhættulegar að sögn Margrétar en mennirnir hafi klárlega ekki kynnt sér landslagið í kring þar sem er fullt af slíkum holum.
„Ég er þarna með minn bíl og mína farþega en ég sagði við þau að ég yrði að stoppa, ég yrði að tala við þá og sjá hvort það væri í lagi með þá.“
Margrét segist ekki hafa verið með neinar „blammeringar“ við mennina tvo en hún hafi kurteislega bent þeim á að utanvegaakstur sé bannaður með lögum á Íslandi. Tók hún mynd af bílunum og tilkynnti mönnunum að hún myndi hafa samband við lögreglu.
Hennar upplifun af samskiptum við mennina var sú að þeim hafi verið slétt sama um það sem hún sagði. „Hann bara yppti öxlum og sagðist hafa gert mistök.“
Ekki nægilegar afleiðingar fyrir ferðamenn
Hún ítrekar að mjög strangar reglur gildi um utanvegaakstur á Íslandi og að jafnvel leiðsögumenn megi búast við alvarlegum afleiðingum séu þeir staðnir að slíku.
Einnig séu öll fyrirtækin sem starfi á svæðinu nálægt Kötlu með sérstakt leyfi frá landeiganda til þess að vera þar. Hún getur ekki ímyndað sér að mennirnir tveir hafi sótt um neitt slíkt leyfi.
„Þetta eru bara menn sem er skítsama hvað þeir eru að gera, af því að því miður eru aldrei neinar afleiðingar hérna á Íslandi,“ segir Margrét.
Margrét stóð mennina að þessu þann 16. júní og segist síðan hafa mætt þeim aftur daginn eftir þegar hún var á leið upp í Þórsmörk. Hún hafi haft augun opin fyrir hjólförum utan vegar á meðan hún var þar en ekki séð nein slík.
Ísland er viðkvæmt
„Við eigum ekki að láta þetta líðast, landið okkar er svo viðkvæmt og maður verður svo sár og reiður af því að maður er að vanda sig svo mikið við að kenna ferðamönnum hversu viðkvæm flóran okkar er, hversu lengi mosinn er að vaxa, hversu mikið við Íslendingar berum virðingu fyrir náttúrunni,“ segir Margrét.
„Jú, auðvitað höfum við líka fífl hérna heima, síðasta fíflið hefur ekki enn verið fætt, en maður verður ennþá reiðari þegar fólk gefur bara skít í allt og alla og fer þar sem því sýnist og lætur svo eins og ekkert sé.“
Margrét er mjög ánægð með athyglina sem mennirnir tveir hafa dregið að sér og segir þá ekki munu fara fram hjá neinum í ferðaþjónustunni það sem af er ferðar þeirra. Þetta verði vonandi til þess að þeir hljóti afleiðingar af gjörðum sínum.
Hún segir það geta tekið mörg ár fyrir spor sem utanvegaakstur myndar að hverfa. „Þú ættir að prófa að keyra í gegnum Skeiðarársand, þar er hræðilega ljótt að sjá förin sem eru jafnvel orðin margra ára gömul.“
