Fyrirtæki sem selja eldsneyti hafa ekki sýnt neinn vilja til að slá á verðbólgu, segir Runólfur Ólafsson framkvæmdastjóri FÍB, Félags íslenskra bifreiðaeigenda. Það sýni síhækkandi álagning þeirra.
FÍB skoraði í gær á atvinnuvegaráðherra sem ráðherra neytendamála og Neytendastofu að gera þeim sem selja orku á ökutæki, bæði jarðefnaeldsneyti og raforku, skylt að birta rauntímaupplýsingar um verð á heimasíðum sínum. Nú þarf aðeins að birta verð á sölustað samkvæmt reglum.
„Við viljum að Neytendastofa haldi utan um þetta og birti gögn um verðsamanburð á bæði bensíni, díselolíu og raforku sem er í boði á flestum stöðvum. Þetta er bara ein leiðin en meginleiðin auðvitað væri sú að félögin á markaðnum skiluðu til neytenda eðlilegra vöruverði,“ segir Runólfur.
Eldsneytisseljendur hafa til 15. ágúst að svara Samkeppniseftirlitinu í framhaldi af umræðuskjali sem það birti í síðustu viku. Forsvarsmenn þeirra hafa ekki viljað tjá sig um skjalið þegar fréttastofa hefur leitað eftir því en vísað í sameiginlega yfirlýsingu Samtaka atvinnulífsins og Samtaka verslunar og þjónustu.
71 króna af lítranum í vasa bensínseljenda samkvæmt útreikningum FÍB
FÍB hefur reiknað út breytingar á lítraverði á blýlausu bensíni fyrstu fimm mánuði ársins miðað við síðustu ár, byggt á tölum Hagstofu. Útsöluverðið er lægra í ár af því vörugjald var fellt niður um áramót. Í staðinn greiða bensínbílaeigendur kílómetragjald. Verðið er vegið meðalverð á lítra uppreiknað til verðlags á þessu ári. Innkaupsverð með opinberum gjöldum er því lægra vegna breytinganna. Skattarnir eru lægri sömuleiðis vegna breytinga um áramótin og líka vegna lækkunar á virðisaukaskatti 1. maí. Útsöluverð mínus kostnaðarverð á lítra uppreiknað með vísitölu neysluverðs til verðlags í ár, það er að segja það verð sem innflytjendur blýlauss bensíns og smásalar fá samanlagt samkvæmt útreikningum FÍB, var tæpar 38 krónur 2021, 35 kr. 2022, fór í 51 kr. 2023, 54 kr. 2024 og 58 krónur í fyrra. Fyrstu fimm mánuði ársins fá bensínseljendur hins vegar 71 krónu á hvern lítra af blýlausu bensíni í sinn hlut samkvæmt útreikningum FÍB byggt á innflutningstölum og -verði frá Hagstofunni.
„Það er mjög sláandi að það er 20% hækkun á föstu verðlagi það sem af er þessu ári miðað við allt árið í fyrra á álagningu á hvern bensínlítra. Og það munar nú um minna fyrir almenning. Á sama tíma er verið að reyna að blása í einhverja herlúðra og slá á verðbólguna. Þessi fyrirtæki hafa ekki sýnt neinn vilja til þjóðarsáttar í þessa átt.“
Átta af hverjum tíu rafbílar
Sala á rafbílum heldur áfram að aukast. 7500 nýir fólksbílar voru nýskráðir í janúar til júní samkvæmt Bílgreinasambandinu. Þar af eru 4100 bílar í eigu ökutækjaleiga. Þrettán prósent þeirra eru rafbílar. Fyrirtæki önnur er bílaleigur nýskráðu rúmlega 900 fólksbíla. Sjö af hverjum tíu þeirra eru rafbílar. Almenningur skráði 2500 nýja bíla. Einstaklingar virðast æ meira verða afhuga bílum sem ganga fyrir jarðefnaeldsneyti. Í fyrra var 66 prósent þeirra rafbílar. 5. Fyrstu sex mánuði þessa árs var hlutfallið 81 prósent. Það þýðir að átta af hverjum tíu bílum sem almenningur hefur keypt á árinu eru rafbílar.
„Það er greinilegt að þessi síðasta breyting varðandi vörugjöld sem átti sér stað um síðustu áramót, það hefur haft áhrif. Fleiri eiga þess kost að geta keypt rafbíl. Og svo hefur bara auðvitað orkuverð í heiminum, meðal annars átökin í Íran og áhrifin á olíuverðið með lokun Hormússunds, það hefur svona eiginlega ýtt við frekari þróun og frekari áhuga neytenda á öðrum orkugjöfum heldur en olíueldsneyti.“
