Reykjavíkurborg hefur samþykkt breytingar sem leiða til uppsagna 86 starfsmanna. Af þeim fá 32 boð um ný eða breytt störf en 54 fá ekki áframhaldandi starf.
Þetta eru ekki fyrstu hagræðingaraðgerðirnar frá því ný borgarstjórn tók við völdum í lok maí. Og í raun ættu hagræðingaraðgerðir þeirra flokka sem mynda meirihluta í borgarstjórn, Sjálfstæðisflokks, Framsóknarflokks og Viðreisnar, ekki að koma neinum á óvart.
Í lok nóvember í fyrra kynnti Framsóknarflokkurinn, á blaðamannafundi, hagræðingartillögur sínar í borginni og lagði meðal annars til að miðstöðvum borgarinnar yrði fækkað í tvær og sala á Landsneti kláruð.
Þá talaði Hildur Björnsdóttir, borgarstjóri og oddviti Sjálfstæðisflokksins, ítrekað um hagræðingu í rekstri borgarinnar í sinni kosningabaráttu.
Og að kosningum loknum sagði hún ljóst að kjósendur hefðu gefið flokknum skýrt umboð til niðurskurðar í rekstri borgarinnar.
Rætt var við Björgu í Speglinum í kvöld.
Ekki fyrstu hagræðingaraðgerðirnar
Í Kastljósþætti 27. maí sagði Hildur að meirihlutinn myndi ráðast í miklar hagræðingar- og stjórnkerfisbreytingar. Fækka ætti millistjórnendum og einblína á grunnþjónustu við íbúa. Taka fjármuni úr kerfunum og setja þá í hverfin.
Hildur sagði jafnframt að meirihlutinn væri ekki með nákvæma tölu á því hversu mörgum starfsmönnum yrði sagt upp en að sú vinna væri fram undan.
Í gær var tilkynnt að hópur skólaliða í Reykjavík hefði fengið uppsagnarbréf og störfum þeirra hefði verið útvistað.
Í júní var upplýsingafulltrúum frá umhverfis- og skipulagssviði, velferðarsviði og skóla- og frístundasviði sagt upp auk fleiri starfsmanna.
Alls voru 18 störf lögð niður og níu færð til á milli sviða. Tvær af fimm skrifstofum ráðhússins hafa verið lagðar niður, annars vegar Mannréttindaskrifstofa og hins vegar skrifstofa samskipta og viðburða.
Hildur sagði þá að breytingarnar myndu lækka rekstrarkostnað um 280 til 330 milljónir króna á ári. Það væri aðallega launakostnaður.
Á fundi borgarráðs í morgun var svo lögð fram trúnaðarmerkt tillaga borgarstjóra um breytt skipulag velferðarsviðs og skóla- og frístundasviðs.
Tillagan var samþykkt með fimm atkvæðum borgarráðsfulltrúa Sjálfstæðisflokksins, Miðflokksins, Viðreisnar og Framsóknarflokksins gegn tveimur atkvæðum borgarráðsfulltrúa Samfylkingarinnar.
Börn og fjölskyldur sækja þjónustu á einn stað
Nýtt skipurit hefur áhrif á 400 starfsmenn á sviðunum tveimur.
Þessar hagræðingar eiga að skila um 900 milljónum króna á ársgrundvelli - samhliða styrkingu framlínuþjónustu.
Miðstöðvar Reykjavíkurborgar – Vestur-, Norður-, Austur- og Suðurmiðstöð verða lagðar niður sem sérstakar skipulagseiningar sem og frístundamiðstöðvarnar Brúin, Kringlumýri, Miðberg og Tjörnin auk Keðjunnar og Virknihúss.
Verkefni þeirra verða færð undir nýtt skipulag skóla- og frístundasviðs og velferðarsviðs.
Þá verður Alþjóðateymi lagt niður.
Björg Magnúsdóttir, forseti borgarstjórnar og oddviti Viðreisnar, segir margra mánaða vinnu hagræðingarhóps borgarstjórnar ásamt fleirum, liggja að baki tillögunum.
„Það eru uppsagnir og þetta var mjög erfiður dagur. Við erum að sjá á eftir mjög hæfu starfsfólki. En breytingarnar miða allar að því að verja framlínuþjónustu, verja fólkið sem er í beinni þjónustu við borgarbúa,“ segir Björg.
„Og þetta er allt sem við töluðum mikið um fyrir kosningar þannig nú er komið að því að hrinda þessu í framkvæmd.“
Tvær nýjar þjónustueiningar í stað fjögurra áður
Þjónustumiðstöðvar borgarinnar verða í óbreyttri mynd fram til áramóta.
Þá munu tvær nýjar einingar taka við af þeim fjórum miðstöðvum sem eru núna.
„Það er barna- og fjölskylduþjónusta, ásamt skóla- og frístundaþjónustu og félags- og húsnæðisþjónustu.“
Björg segir að starfsemi miðstöðvanna fjögurra hafi dregist saman um allt að 60% undanfarin ár. Bæði frá því að málefni fatlaðs fólks voru færð miðlægt inn á velferðarsvið en líka með breytingum í samfélaginu.
„Við erum með mjög öfluga rafræna miðstöð, við sjáum að fólk leitar mikið þangað. Og þetta má alveg skoða í stærra samfélagslegu samhengi, við sjáum þetta bara með banka og pósthús. Fólk fer þangað í minna mæli.“
Björg segir hins vegar mikilvægt að sinna vel þeim hópi fólks sem vill geta reitt sig á þjónustu borgarinnar í sínu nærumhverfi.
„Og þar ætlum við sérstaklega að nýta betur húsnæðin sem borgin á inni í hverfunum. Borgin á ógrynni húsnæðis inni í hverfunum, þar getum við talað um bókasafn, sundlaugar, skólabyggingar og fleira.“
Mikil áhersla á að ekki verði þjónusturof
Hefurðu áhyggjur af því að það verði þjónusturof á meðan þessar breytingar eru innleiddar?
„Þjónusturof er auðvitað eitthvað sem við horfum alltaf sérstaklega vel til i svona stórum breytingum. Og það er eitthvað sem sviðin hafa í algjörri gjörgæslu núna. Við höfum reynt að búa þannig um hnútana að þetta rúlli áfram með sama hætti, fólk fái sömu þjónustu með sama hætti og verið hefur. Þetta er algjörlega á radar hjá sviðstjórum og öllu borgarkerfinu að ekki verði þjónusturof.“
