Margir kannast við Facebook-hópa á borð við Beauty tips eða Mæðra tips sem eru með á bilinu 35-50 þúsund fylgjendur. Facebook-hópur um sveppi á Íslandi hefur náð yfir 30 þúsund meðlimum og hefur áhuginn á sveppatínslu aldrei verið meiri.
„Áhuginn er að aukast. Sérstaklega eftir hrun, byrjaði fólk að leita meira í náttúrugildi og nota efnivið sem er í kringum það. Útlendingar sem hafa flutt til Íslands hafa tekið þessa menningu með sér villisveppatínsla er mjög algeng í Evrópu en hún hefur ekki verið eins algeng á ÍSlandi en er að verða algengari og algengari. Við erum með suma af bestu villisveppum sem eru til í heiminum á Íslandi,“ segir Jóhannes Bjarki Urbancic Tómasson, framkvæmdastjóri Sveppafélagsins.
Undanfarið hefur borið á mörgum fyrirspurnum um Trjónupeðlu í Facebook-hópnum Funga Íslands, svo mörgum að einhverjir meðlimir hafa fengið nóg og farið úr hópnum. Trjónupeðla er á lista yfir ólögleg fíkniefni enda inniheldur hún eiturefnin psilocybin og psilocin sem hafa áhrif á miðtaugakerfið.
Þeir sem spyrjast fyrir um trjónupeðlu koma iðulega ekki fram undir nafni en eftirspurnin er orðin svo mikil að sérstakur hópur hefur verið stofnaður fyrir þá. Að meðaltali koma 4-5 innlegg á dag um trjónupeðlur.
