Sonur Monu Juul, sem sagði af sér sem sendiherra Noregs í Jórdaníu og Írak vegna tengsla við kynferðisbrotamanninn Jeffrey Epstein, er látinn. Juul og eiginmaður hennar gagnrýna áhrifin sem fjölmiðlaumfjöllun í kringum tengslin við Epstein hefur haft á börnin þeirra.
Annar lögfræðinga hjónanna staðfesti andlátið við norska ríkisútvarpið NRK og sagði soninn hafa svipt sig lífi. Hann var 25 ára. Elden segir hjónin í miklu áfalli.
Juul og eiginmaður hennar, Terje Rød-Larsen, hafa verið mikið í umræðunni í Noregi vegna tengsla sinna við Epstein.
Allt bendir til að tengsl hjónanna við Epstein hafi verið náin og umfangsmikil. Juul sagði af sér sem sendiherra í byrjun febrúar og var ákærð fyrir alvarlega spillingu. Þá var Rød-Larsen ákærður fyrir aðild að brotum hennar en hjónin hafa bæði neitað sök.
Börn hjónanna dregin ósjálfrátt inn í umræðuna
Í yfirlýsingu frá lögmönnum hjónanna er fjölmiðlaumfjöllun í kringum þau og málið harðlega gagnrýnd. Þar segir að umræðan sé ekki lengur gagnrýnin og að hún sé jafnframt orðin takmarkalaus á tímum. Sviðsljósið hafi ekki aðeins haft áhrif á foreldrana heldur hafi börn þeirra verið dregin ósjálfrátt inn í umræðuna.
Í yfirlýsingunni segjast lögmennirnir hafa verið í sambandi við son hjónanna undanfarna mánuði. Hann hafi lýst miklu álagi sem fylgdi aukinni athygli fjölmiðla og almennings. Þeir taka þó fram að ekki sé ljóst hvort það hafi verið ástæða þess að hann tók eigið líf.
„Harmleikir eins og þessir neyða okkur til að sjá það sem við kjósum annars að hunsa: Að á bak við hvert mál er líf. Á bak við hverja fyrirsögn er fólk sem elskar, óttast og vonar. Og á bak við hvert barn eru foreldrar sem aldrei, aldrei hætta að vera foreldrar,“ segir í yfirlýsingu lögmannanna.
Nafn sonarins og systkina hans birtist í norskum fjölmiðlum í kjölfar þess að þeirra var minnst í Epstein-skjölunum. Börn hjónanna eru einnig í erfðaskrá Epsteins sem hann gerði tveimur dögum fyrir andlát sitt. Juul hefur áður sagt að fjölskyldan hafi ekki vitað það fyrr en það kom fram í fjölmiðlum.
