Slökkvilið höfuðborgarsvæðisins hefur náð að slökkva eld sem logaði í plastkörum og bílhræjum á geymslusvæði á Völlunum í Hafnarfirði. Beita þurfti skotbómulyftara á vegum eiganda svæðisins til að róta í ruslinu og eftir það gekk greiðlega að slökkva eldinn að sögn Guðjóns Ingasonar varðstjóra.
Hins vegar þurftu slökkviliðsmenn að kæla niður tvo gáma sem hitnuðu af völdum eldsvoðans. Tilkynning um að talsverður eldur logaði á Völlunum barst laust eftir klukkan ellefu í kvöld. Guðjón sagði áhöfn á einum bíl hafa verið senda á vettvang. Ekkert fólk hafi verið í hættu.
Fréttin var uppfærð og breytt eftir að eldurinn var slökktur.
