Er þetta meðal þess sem kemur fram í hugleiðingum veðurfræðings á Veðurstofu Íslands en þar segir einnig að síðdegis muni draga eitthvað úr bæði vindi og úrkomu og fer þá lægðin að fjarlægast okkur hægt og bítandi. Í kvöld er svo von á norðan 3 til 8 metrum á sekúndu með súld á norðanverðu landinu en annars þurrt að mestu.
Þá kólnar smám saman í veðri, einkum fyrir norðan, og fer hitinn mest upp í átta stig syðst á landinu en verður víða við frostmark. Má gera ráð fyrir næturfrosti allvíða.
Á morgun, mánudag, verður veðri svo misskipt milli landshluta og er spáð norðan 3 til átta metrum á sekúndu með bjartviðri á vestanverðu landinu en norðaustantil eru horfur á norðvestan 5 til 13 með rigningu, slyddu eða snjókomu. Rigning næst sjávarmáli en líkur á snjó aukast eftir því sem hærra er farið.
Suðaustanlands er svo von á rigningu og tiltölulega litlum vindi en hiti verður áfram frá frostmarki og fer mest upp í átta stig syðst á landinu.
Veðurhorfur á landinu næstu daga:
Á mánudag: Norðan 3-8 m/s um landið vestanvert og bjartviðri. Norðvestan 5-13 norðaustantil og rigning, slydda eða snjókoma með köflum. Fremur hæg breytileg átt á Suðausturlandi og rigning um tíma. Hiti frá 1 stigi í innsveitum á Norðausturlandi, upp í 8 stig syðst. Yfirleitt þurrt á landinu um kvöldið og frystir allvíða.
Á þriðjudag: Hæg breytileg átt og víða þurrt og bjart veður. Hiti 2 til 7 stig yfir daginn, en víða næturfrost.
Á miðvikudag: Hæg suðlæg eða breytileg átt. Víða léttskýjað, en líkur á lítilsháttar skúrum við suðvestur- og vesturströndina. Hiti breytist lítið.
Á fimmtudag: Stíf suðaustanátt með rigningu, talsverð úrkoma á sunnanverðu landinu. Hiti 3 til 9 stig. Hægari vindur og skúrir vestanlands um kvöldið.
Á föstudag og laugardag: Breytileg átt og líkur á vætu með köflum í flestum landshlutum. Hiti 3 til 8 stig.
