Sjálfstæðisflokkurinn er stærsti flokkurinn í borginni samkvæmt nýrri könnun Gallups. Flokkurinn bætir við sig á milli kannana og mælist með 30%. Sósíalistar bæta einnig við sig talsverðu fylgi. Vinstrið og Píratar standa í stað en aðrir flokkar tapa fylgi.
Könnunin var gerð 17. til 29. apríl en Gallup birtir ekki niðurstöðurnar fyrr en líða fer nær kosningum. Stjórnmálaflokkar geta aftur á móti keypt aðgang að þessum upplýsingum. Á meðfylgjandi mynd sjáum við samanburð á fylgi flokkanna úr þjóðarpúlsi Gallup sem birtur var 17. apríl og svo fylgið eins og það mældist síðustu tvær vikurnar í apríl.
Rétt er að taka fram að þessar tölur eru ekki úr Þjóðarpúlsi Gallups og ekki birtar opinberlega af Gallup. Það fást því ekki nákvæmar tölur, en þær eru námundaðar við næstu sléttu tölu.
Sjálfstæðisflokkurinn bætir við sig fylgi í seinni hluta mánaðarins, fer úr tæplega 28% í 30%. Samfylkingin fer úr rúmlega 23% og niður í 22%. Vinstrið, sameiginlegt framboð Vinstri grænna og Vors til vinstri, stendur nokkurn veginn í stað og mælist með 13%.
Miðflokkurinn fer úr 11% í 10% og Viðreisn úr 10% og niður í 9%. Sósíalistaflokkurinn bætir við sig fylgi, fær 5% seinni vikur aprílmánaðar en mældist með 3% fyrstu tvær.
Framsóknarflokkurinn fer úr 4% og niður í 3%. Píratar halda sínu með 3% og Flokkur fólksins fer úr 4% og niður í 2%. Önnur framboð mælast með minna en tveggja prósenta fylgi.
