Sjálfstæðisflokkurinn mælist með mest fylgi allra stjórnmálaflokka í Reykjavík í glænýrri skoðanakönnun Maskínu. Flokkurinn mælist með 31,3 prósent sem er nákvæmlega sama fylgi og í Þjóðarpúlsi Gallups sem birtist í dag.
Það væri mesta fylgi flokksins síðan árið 2010. Samfylkingin mælist með 19,4 af hundraði, Viðreisn tólf, Vinstrið ellefu og Miðflokkur tæp tíu. Framsóknarflokkurinn fær rúm sex prósent, Sósíalistaflokkurinn 4,5 og Flokkur fólksins 2,6.
Píratar mælast með 2,4 prósent og Góðan daginn og Okkar borg með hálft prósent hvor. Sósíalistar næðu inn manni í borgarstjórn en enginn hinna síðasttöldu gerði það, gangi niðurstöður könnunarinnar eftir.
Píratar fengu þrjá menn kjörna 2022 og Flokkur fólksins einn. Núverandi meirihluti er fallinn gangi þessar tölur eftir.
Samkvæmt niðurstöðum Gallup-könnunarinnar hefði Sjálfstæðisflokkurinn getað myndað meirihluta með Framsókn og Miðflokki en það er ekki uppi á teningnum hér. Sjálfstæðisflokkur fengi átta borgarfulltrúa og bætti við sig tveimur og Samfylkingin héldi sínum fimm.
Vinstrið og Viðreisn fengju tvo fulltrúa hvort, Miðflokkurinn tvo og Framsóknarflokkurinn einn. Sjálfstæðisflokkur, Viðreisn og Framsóknarflokkur eru samtals með tólf menn inni samkvæmt könnun Maskínu en ellefu í Gallupkönnunninni frá í dag.
Könnun Maskínu var gerð 12. til 15. maí og tæplega 3.000 svarendur tóku afstöðu á netinu úr hópi 18 ára og eldri búsettum í Reykjavík. Svörin voru vegin samkvæmt mannfjöldatölum Hagstofunnar um kyn, aldur og menntun svo að þau endurspegluðu þýðið betur.
