José Manúel Albares Bueno, utanríkisráðherra Spánar, segir Íslendinga ekki þurfa að óttast að missa fullveldið gangi þeir í Evrópusambandið.
Hann sat fund Alþjóðamálastofnunar Háskóla Íslands með Þorgerði Katrínu Gunnarsdóttur utanríkisráðherra í dag en fundurinn var haldinn í tilefni af vaxandi samskiptum ríkjanna.
Meðal þess helsta sem rætt var á fundinum var komandi þjóðaratkvæðagreiðsla um framhald aðildarviðræðna Íslands við Evrópusambandið en Albares sagði Ísland nú í svipaðri stöðu og Spánn var fyrir 40 árum, áður en landið gekk inn í Evrópusambandið.
„Saga Spánar, líkt og flestra landa sem gengið hafa inn í sambandið, sýnir að það að vera í ESB hefur heppnast afar vel. Uppbygging Spánar og þá sérstaklega innviða hefði ekki verið möguleg ef við hefðum ekki verið inni í Evrópusambandinu,“ sagði Albares.
Fullveldið aukist í raun
Spurður hvort hann teldi réttmætt að hafa áhyggjur af því framsali á fullveldi sem innganga í ESB hefur í för með sér sagðist hann ekki telja svo.
„Í heiminum í dag er fullveldið í húfi, þó ekki sökum ágengni Evrópusambandsins. Með inngöngu í Evrópusambandið eykst í raun fullveldi landa því þá fá þau loks sæti við borðið. Það sem er merkilegt við Evrópusambandið er að það byggir ekki á því að ríkin séu þvinguð í eitthvað sem hentar þeim ekki,“ sagði Albares á fundinum.
Hagsmunir Íslands helsta ástæðan
Þorgerður Katrín var einnig spurð að því á fundinum af hverju nú væri rétti tímapunkturinn til að endurvekja Evrópuumræðuna á Íslandi.
„Af hverju erum við að þessu nú? Svarið við því er einfaldlega að við erum að gæta og tryggja sem besta hagsmuni fyrir Ísland. Það er einlæg trú mín að í heiminum í dag, þar sem óstöðugleiki hefur farið vaxandi, að hagsmunum Íslands sé betur borgið innan sambandsins en utan þess og að við munum fá góðan samning fyrir inngöngu.“
Undir þetta tók Albares, sem sagði val Íslands vera skýrt og að mikilvægt væri að líkt þenkjandi ríki stæðu saman á tímum aukins óstöðugleika í heiminum.
„Skipan mála í heiminum breytist nú ört og heimsókn José til Íslands er mikilvæg áminning um að lýðræðislönd líkt og Ísland og Spánn standa saman í heimi þar sem óstöðugleiki fer vaxandi,“ sagði Þorgerður.
Telur ESB geta lært ýmislegt af Íslandi í fiskveiðimálum
Eitt helsta deiluefnið í umræðu um Evrópumálin og hugsanlegar viðræður Íslands við Evrópusambandið hér á landi hefur verið sjávarútvegsmálin, þar sem deilt er um hvort mögulegt sé fyrir Ísland að fá varanlegar undanþágur frá sameiginlegri fiskveiðistefnu sambandsins.
Sagði Albares að þegar kæmi að sjávarútvegsmálum liti hann mun frekar á Ísland sem samstarfsaðila en keppinaut.
Þorgerður tók þá undir með honum og sagði Ísland hafa margt fram að færa þegar kæmi að fiskveiðum. Hlutfallslega væri Ísland meiri stórþjóð í fiskveiðum á heimsvísu en Þjóðverjar í bílaframleiðslu og að sérkunnátta Íslands væri ómetanleg.
Þar að auki teldi hún að þekking og skipan sjávarútvegsmála á Íslandi gæti verið fyrirmynd fyrir Evrópusambandið ef það sæi ástæðu til að gera endurbætur á sínu fiskveiðistjórnunarkerfi.
