Utanríkisráðherra Spánar segir átak spænskra stjórnvalda í málefnum innflytjenda sýna fram á að hægt sé að reka innflytjendastefnu með góðum árangri með mannúð að leiðarljósi. Áherslur bandarískra stjórnvalda á alþjóðavettvangi geri það að verkum að Evrópuríki þurfi að reiða sig í auknum mæli á hvort annað. Stefnt sé að opnun spænsks sendiráðs á Íslandi eins fljótt og auðið er.
Jose Manuel Albares Bueno, utanríkisráðherra Spánar, fundaði með utanríkisráðherra á opnum fundi í Norræna húsinu í vikunni. Þar ræddu ráðherrarnir meðal annars sviptingar á alþjóðavettvangi og samskipti Íslands og Spánar.
Vilja veita hálfri milljón innflytjenda dvalarleyfi til eins árs
Yfirvöld á Spáni ákváðu nýverið að hrinda af stað átaki sem miðar að því að veita um hálfri milljón innflytjenda dvalarleyfi í eitt ár. Hægt verður að sækja um framlengingu. Einu kröfurnar eru að fólk hafi komið til Spánar fyrir síðustu áramót og hafi hreint sakavottorð.
Framtakið stangast á við þróun innan margra annarra Evrópuríkja sem hert hafa innflytjendastefnur að undanförnu. Albares segir það endurspegla mannúðlega sýn spænskra stjórnvalda á málaflokkinn sem viðurkenni það að allir menn búi yfir sömu mannlegu reisn.
„Þetta eru einstaklingar sem hafa búið á Spáni í mörg ár og tekið þátt í efnahagslegri og félagslegri þróun landsins. Þetta er ekki fólk sem er nýkomið til landsins – það býr hér þegar og starfar,“ segir Albares.
„Því er eðlilegt að þetta fólk hafi bæði skyldur og réttindi, greiði í almannatryggingakerfið og njóti jafnframt þeirra réttinda sem því fylgja.“
Ráðherrann segir innflytjendastefnu Spánar árangursríka, stuðla að hagvexti og auka atvinnutækifæri. Þá hafi ólöglegar komur til landsins einnig dregist saman.
„Við erum nú með lægstu tölur innan Evrópusambandsins þegar kemur að ólöglegum komum til landsins. Ólöglegum komum um strendur Andalúsíu og Kanaríeyja hefur fækkað um allt að 60 prósent. Á sama tíma er hagvöxtur einna hæstur á Spáni innan ESB og atvinnustig hefur aldrei verið hærra“
Aukin spenna milli spænskra og bandarískra stjórnvalda
Talsverð spenna hefur ríkt á milli Spánar og Bandaríkjanna að undanförnu, sér í lagi frá því stríðið í Mið-Austurlöndum braust út.
Þegar stríðið braust út bönnuðu spænsk stjórnvöld meðal annars að herstöðvar þar í landi yrðu notaðar í stríði Bandaríkjanna og Íran. Stuttu síðar sakaði Donald Trump Bandaríkjaforseti Spán um svik gegn Atlantshafsbandalaginu og sagðist vilja að ríkið yrði rekið úr því.
Spurður hvaða áhrif versnandi samskipti Spánar og Bandaríkjanna síðustu mánuði hafi á stöðu Spánar segir Albares Bandaríkjamenn hafa verið nána bandamenn Evrópuríkjanna í gegnum tíðina.
„Það sem við höfum gert saman hefur aukið bæði velsæld og öryggi í samstarfi þvert á Atlantshafið. Við vinnum að því að svo verði áfram. En núverandi stjórnvöld í Bandaríkjunum hafa sett fram nýjar áherslur á sviði viðskipta- og öryggismála.
Það þýðir að Evrópuríkin þurfa að gera meira sjálf, bæði með því að fara í samstarf við fleiri ríki og með því að styrkja evrópskan grunn NATO á sviði öryggismála,“ segir Albares.
Opnun sendiráðs á Íslandi í forgangi spænskra stjórnvalda
Sendiráð Íslands í Madríd var opnað í desember í fyrra. Albares segir opnun þess jákvæða fyrir samskipti ríkjanna. Spánn hefur haft fasta diplómatíska viðveru í Reykjavík undanfarin ár.
Albares segir að um þessar mundir sé verið að semja um fjárveitingar í næstu fjárlögum spænskra stjórnvalda og að eitt þeirra atriða sem til skoðunar verði sé opnun sendiráðs á Íslandi. Ráðherrann segir að fyrir liggi áætlun um að auka umsvif spænsku utanríkisþjónustunnar í heiminum.
„Opnun sendiráðs á Íslandi er eitt af algjörum forgangsmálum í þessari stefnu. Ég get ekki nefnt nákvæma dagsetningu um hvenær við opnum sendiráðið en get þó sagt að það verður eins fljótt og auðið er.“
