Formaður Félags skólastjórnenda í Reykjavík segir samstarf stjórnvalda og kennara skipta meira máli en mælikvarði. Mikilvægt sé að standa vörð um skólakerfið svo það verði alltaf hvetjandi fyrir nemendur.
Af hverju erum við að gera þetta?
Frá og með næsta vori verða einkunnir við lok grunnskóla gefnar í tölustöfum í stað bókstafa. Inga Sæland, mennta- og barnamálaráðherra, tilkynnti um breytinguna á þingi Kennarasambands Íslands fyrir fjórum mánuðum – við mikla undrun kennara, sem sökuðu ráðherra um samráðsleysi.
Samkvæmt gildandi aðalnámskrá byggir námsmat á bókstafskvarða sem tengdur er hæfni og matsviðmiðum í lok fjórða, sjöunda og tíunda bekkjar.
Menntamálaráðherra segir breytinguna svar við ákalli samfélagsins. Markmiðið sé að gera einkunnagjöf auðskiljanlegri og skýrari fyrir nemendur, foreldra og skólasamfélagið – auk þess að samræma hana milli skóla.
„Ég hugsa að það sé auðskiljanlegra fyrir foreldra,“ segir Guðjóna Eygló, og heldur áfram.
„En þá komum við að þeirri spurningu: Erum við að gera þetta til þess að vita hvar þau eru í röðinni miðað við hina? Eða erum við að gera þetta til þess að þau viti hvar þau eru stödd í sínu eigin námi og hvaða skref þau eru að taka næst?“
„Það skiptir ekki máli hvaða kvarði er notaður“
Breytingarnar verða innleiddar í tveimur áföngum og undirbúningur er hafinn hjá Miðstöð menntunar og skólaþjónustu. Gert er ráð fyrir að fyrsti áfangi taki gildi næsta vor og nái til lokamats tíunda bekkjar. Einkunnir verða gefnar í heilum tölum á bilinu 1-10.
Það skiptir í raun og veru ekki máli hvaða kvarði er notaður, við gætum verið með dýratákn þess vegna. Það skiptir bara máli að við stöndum vörð um að kerfið verði alltaf hvetjandi fyrir alla nemendur.
Núverandi fyrirkomulag námsmats hvetjandi
Árið 2016 var í fyrsta sinn gefin einkunn í bókstöfum við lok grunnskóla. Guðjóna Eygló segir að slíkt fyrirkomulag hafi gefist vel, þar sem hæfni sé tekin inn við námsmat. Það sé hvetjandi og gefi nemendum betri tilfinningu fyrir því hvar þeir eru staddir í náminu.
„Ég óttast að þegar við erum að fara að útskrifa einhverja krakka með fimm, þá gæti það orðið sárt. Ég vil ekki að það sé sárt að útskrifast úr grunnskóla,“ segir hún.
„En þegar við höfum C, þá er það meira eins og „Þú ert á leiðinni, þú ert á leiðinni, bara haltu áfram, þetta er allt í lagi.““
Skólasetning er í næstu viku og kennarar í óðaönn að undirbúa komandi skólaár. Guðjóna Eygló segir tímann knappan fram að innleiðingu.
„Það skiptir máli hvernig við innleiðum breytingar,“ segir hún.
„Og núna til dæmis held ég að rétta spurningin sem við ættum að fara að spyrja, og ráðuneytið ætti að fara að spyrja kennara, er: Hvaða stuðning þurfið þið til að innleiða? Hverju mun þetta breyta? Það þarf að taka upp samtal.“
Enn sé margt á huldu sem þurfi að ræða við kennara.
„Eru allir að fara að reikna meðaltöl? Við höfum ekki verið að gera það undanfarin ár. Hvernig ætlum við að gera þetta? Við þurfum að gera þetta saman.“
