Umræður um þjóðaratkvæðagreiðslu um að hefja á ný aðildarviðræður Íslands að Evrópusambandinu voru lengsta einstaka umræða 157. löggjafarþings, en hún stóð samtals í 58 klukkustundir og 16 mínútur.
Þetta er meðal þess sem fram kemur í tölfræði sem skrifstofa Alþingis hefur tekið saman.
Þingi var frestað í dag.
Fundað í 844 klukkustundir
Þingið starfaði frá 9. september til 18. desember 2025 og svo aftur frá 14. janúar til dagsins í dag. Var á þeim tíma haldinn 131 þingfundur og stóðu þeir samtals í 844 klukkustundir og 21 mínútu. Að meðaltali stóð hver fundur því í sex klukkustundir og 23 mínútur.
Lengsti þingfundurinn stóð í 13 klukkustundir og 27 mínútur.
Af þeim 188 frumvörpum sem lögð voru fram urðu 105 að lögum, 83 voru óútrædd og eitt var ekki samþykkt.
22 þingsályktunartillögur samþykktar
Þá voru 22 af 95 þingsályktunartillögum samþykktar en 73 óútræddar.
Alls voru 729 þingmál tekin til meðferðar á þessu þingi og við þinglok höfðu 1.460 þingskjöl verið prentuð.
Fyrirspurnir á þingskjölum voru 399 samtals. Fyrirspurnir til munnlegs svars voru 31 og var 21 svarað en ein kölluð aftur og ein felld niður vegna ráðherraskipta.
15 fyrirspurnir lagðar af vegna ráðherraskipta
Þá voru 368 skriflegar fyrirspurnir lagðar fram og var 269 þeirra svarað, 15 voru felldar niður vegna ráðherraskipta. 84 biðu svars er þingi var frestað.
Óundirbúnar fyrirspurnir til ráðherra voru 267 og sérstakar umræður voru 19. Samtals höfðu verið haldnir 500 fundir hjá fastanefndum þegar þingi var frestað.
32 skriflegar skýrslur voru lagðar fram. 16 beiðnir um skýrslur komu fram, þar af 16 til ráðherra. Fjórar munnlegar skýrslur ráðherra voru fluttar.
