Einhver miður skemmtilegur einstaklingur tilkynnti til Google að Fiskbúð Fúsa væri lokuð. Sigfús Sigurðsson, eigandi búðarinnar og fyrrum landsliðsmaður í handbolta, segir svona skemmdarverk geta haft alvarlegar afleiðingar fyrir sitt lífsviðurværi.

Sigfús Sigurðsson, jafnan kallaður Fúsi, birti færslu á samfélagsmiðlum sínum þar sem hann greinir frá því að vefsvæði fiskbúðar hans á Google hafi verið hnekkt. Búðin var sögð ýmist tímabundið eða alfarið lokuð í leitarvélum eftir að svokölluð ábending þess efnis var send inn.

„Það var einhver miður góður/skemmtilegur einstaklingur sem sendi inn 'ábendingu/ar' til google um að það væri búið að loka búðinni hjá okkur og þegar búðin var googluð þá kom upp að hún væri alfarið lokuð eða tímabundið lokuð,“ skrifar Fúsi á síðu sína.

Þurfti að senda myndbönd til Google

Fúsi segir að búið sé að leysa málið en ferlið hafi krafist töluverðrar vinnu. Til þess að sanna að reksturinn væri enn opinn þurfti hann að senda inn staðfestingarmyndbönd, ljósmyndir og skrifleg svör til tæknirisans.

„Það er búið að kippa þessu í liðinn eftir nokkur staðfestingar video, myndir og svör,“ segir Fúsi.

Hann leggur áherslu á að þótt búið sé að leiðrétta villuna, þá geti tjónið setið eftir. Svona skemmdarverk flækja líf sjálfstætt starfandi kaupmanna og geta fælt viðskiptavini frá sem treysta á upplýsingar á netinu.

„Þó að það sé búið að kippa þessu í liðinn þá hefur þetta áhrif og er verulega illa gert, getur haft skaðleg áhrif á reksturinn og mitt lífsviðurværi,“ útskýrir hann.

Frá harðjaxli á vellinum í farsælan kaupmann

Sigfús á að baki glæstan íþróttaferil og er í hópi þekktustu línumanna. Hann var lykilmaður í hinu goðsagnakennda „Silfurliði“ Íslands sem vann til silfurverðlauna á Ólympíuleikunum í Peking árið 2008. Hann lék sömuleiðis um árabil sem atvinnumaður erlendis og var þekktur fyrir mikla hörku, elju og hjarta, bæði í vörn og sókn.

Fúsi hefur verið opinskár með þær áskoranir sem mættu honum eftir að íþróttaferlinum lauk. Hann hefur farið mikinn í umræðunni um baráttu sína við alkóhólisma og fjárhagsvandræði, en hann hefur nú verið allsgáður og edrú í tæp þrjátíu ár.

Árið 2018 hóf hann nýjan kafla í lífinu þegar hann opnaði Fiskbúð Fúsa í Skipholti í Reykjavík. Búðin hefur síðan þá verið hans helsta lífsviðurværi.

Tekur á móti fólki með bros á vör

Fúsi lætur þetta nýjasta tilræði gegn rekstrinum þó ekki eyðileggja fyrir sér daginn og lýkur færslunni á jákvæðum nótum til vina sinna og viðskiptavina:

„Hlakka til að afgreiða ykkur með bros á vör eins flest alla daga. Kær kveðja Fúsi.“