Ríkisendurskoðun hefur sent fyrirspurn á menningar-, nýsköpunar- og háskólaráðuneyti um málefni Háskólans á Bifröst. „Við höfum sent ráðuneytinu fyrirspurn en það er engin úttekt hafin á þessu stigi,“ segir Guðmundur Björgvin Helgason ríkisendurskoðandi í samtali við fréttastofu.
Talsvert hefur verið fjallað um mál Háskólans á Bifröst í fjölmiðlum síðustu mánuði.
Margrét Jónsdóttir Njarðvík, rektor skólans, sagði af sér í febrúar í kjölfar svokallaðs siðanefndarmáls þar sem þrír kennarar sættu skoðun siðanefndar fyrir akademísk skrif sín. Hluti starfsfólks hafði lýst yfir vantrausti á Margréti vegna þess hvernig staðið var að málinu.
Þá hefur verið fjallað um verktakagreiðslur sem hluti kennara þáði um árabil ofan á föst laun og tekið var fyrir í fyrra. Hluti deilnanna sem skekið hafa skólann er sagður tengjast afnámi þeirra.
Fyrirspurn Ríkisendurskoðunar tekur bæði til fjárhagslegra og stjórnsýslulegra þátta en ríkisendurskoðandi vill ekki tjá sig nánar um þá. Hann segir ekki óvenjulegt að Ríkisendurskoðun sendi fyrirspurnir sem þessar og að stofnunin reyni að fylgjast vel með málum.
Í framhaldi af fyrirspurninni leggur Ríkisendurskoðun mat á svör ráðuneytisins áður en ákvörðun er tekin um hvort afla þurfi frekari upplýsinga eða beina tilmælum til ráðuneytisins.
Guðmundur Björgvin útskýrir að sé einhverju mögulega stjórnsýslulega ábótavant sé best að það sé leiðrétt af þeim sem fara með málaflokkinn. „Það þarf ekki alltaf að koma til úttekta,“ segir hann.
Hlutverk Ríkisendurskoðunar er að hafa eftirlit með rekstri og fjármálum ríkisins. Háskólinn á Bifröst er sjálfseignarstofnun en er nær alfarið fjármagnaður af íslenska ríkinu. Skólinn fær í dag um 1200 milljóna króna fjárframlag.
Guðmundur Björgvin útskýrir að Ríkisendurskoðun hafi heimildir til að fylgjast með málaflokknum. Þótt Bifröst sé sjálfseignarstofnun njóti skólinn opinberra fjárframlaga. „Það er í krafti þess sem þetta fellur undir okkar verksvið,“ segir hann.
