„Fólk áttar sig á því að það sem áunnist hefur er fljótt að glutrast niður ef við erum ekki í varðstöðu til að verja það áfram. Það eru mjög sterk öfl alltaf tilbúin til þess að reyna að kroppa í öll áunnin réttindi og það er sama í hverju það er fólgið. Ef verkalýðsfélögin eru ekki til þess að verja þetta, þá erum við fljót að fara á botninn aftur.“
Þetta segir Finnbjörn A. Hermannsson, forseti Alþýðusambands Íslands, spurður um viðbrögð við nýlegum ummælum Björns Brynjúlfs Björnssonar, framkvæmdastjóra Viðskiptaráðs, um verkalýðshreyfinguna.
Björn sagði í nýlegum þætti Þjóðmála að baráttudagur verkalýðsins væri tímaskekkja og að verkalýðsfélög væru úrelt.
Finnbjörn segir að hann skilji afstöðu Björns og Viðskiptaráðs. Verkalýðshreyfingin hafi staðið sterk og varist ásókn fjármálaflanna. Þá hafi verkalýðshreyfingin barist fyrir ýmsu regluverki sem Viðskiptaráð hafi horn í síðu á. „Þannig að ég skil alveg þeirra sjónarmið. Þetta segir okkur bara hversu mikilvæg verkalýðshreyfingin er á Íslandi,“ segir hann.
Finnbjörn segir það ekki skoðun sína né Alþýðusambandsins að leggja eigi Viðskiptaráð niður.
„Við erum alls ekki þeirrar skoðunar. Það eiga allir raddir að fá að heyrast og það eiga allir að fá að stofna sín félög svo fremi sem það er í friðsömum tilgangi og koma sínum sjónarmiðum á framfæri,“ segir Finnbjörn.
Upphaflegum tilgangi verkalýðsfélaga verið náð
Björn Brynjúlfur segir viðbrögðin við ummælum sínum helgast af því að fólk hafi ekki hlustað á þau í samhengi.
„Ég er að hrósa verkalýðsfélögunum og er í rauninni að hvetja þau til þess að fagna sigri vegna þess að þau hafa verið mikið framfaraafl og náð mörgum réttindum í gegn fyrir verkafólk og launafólk og íslenskt samfélag á allri 20. öldinni,“ bendir Björn á. „Við erum komin með þessi réttindi lögfest, við erum með sterkt opinbert velferðarkerfi og við erum með fjölda eftirlitsstofnana sem fylgjast með mögulegum brotum á rétti einstaklinga þannig að ég var í raun og veru að hrósa verkalýðsfélögunum og segja að þau hefðu getað hrósað sigri því upphaflegum tilgangi þeirra hefði verið náð.“
Hann segir verkalýðsfélögin hafa á síðustu árum farið í margvíslega aðra starfsemi. „Þar nefni ég til dæmis að verkalýðsfélögin eru orðin með stærstu fasteignaþróunarfélögum landsins.“
Hann segir að verkalýðsfélögin þurfi að standa á eigin fótum.
„Það er að segja að þau njóti ekki lengur opinberrar meðgjafar. Öll önnur félagasamtök á landinu þurfa að innheimta sín gjöld með því að senda félögum reikninga eða taka við greiðslum en hjá stéttarfélögunum þá er þetta auðvitað dregið af launum fólks. Svokölluð forgangsréttarákvæði þýða það líka að í sumum stéttum verðurðu að vera í stéttarfélagi til að eiga sömu atvinnumöguleika og aðrir. Þannig að hið opinbera hefur búið þannig um hnútana að stéttarfélögin njóta margvíslegrar meðgjafar,“ segir Björn Brynjúlfur.
