Stjórnarandstaðan leggst þvert gegn öllum málum sem ríkisstjórnin kemur með inn í þingið, stundar jafnvel málþóf og tafir við afgreiðslu mála sem fullkomin samstaða er um meðal þingmanna. Engu máli virðist skipta þótt um sé að ræða mál, sem þorri kjósenda styður, á borð við það að eftirliti sé beitt til að tryggja að lækkun virðisaukaskatts á eldsneyti rati til kjósenda en verði ekki notuð til að hækka álagningu olíufélaganna. Ragnar Þór Ingólfsson, félags- og húsnæðismálaráðherra, er gestur Ólafs Arnarsonar í hlaðvarpi Eyjunnar.
Hér er hægt að hlusta á brot úr þættinum:
Ragnar Þór Ingólfsson - 4
En aðeins yfir í pólitíkina, svona á víðari grunni. Það er tekist á á hverjum einasta degi. Meira að segja núna í vikunni þá var samþykkt frumvarp um lækkun virðisaukaskatts tímabundið á bensín og dísel. Það var nú ekki betur hægt að sjá en að stjórnarandstaðan legðist þver og tæki upp svona gamla takta í tafaleikjum og slíku. Hvernig er pólitíkin? Er þetta svona, er stjórnarandstaðan bara, leggst hún þver í öllum málum, alveg burtséð frá því hvað það er?
„Já, það er, það má eiginlega segja það og þetta hefur auðvitað verið, sko, nú hef ég ekkert rosalega mikla reynslu í pólitík. Ég er á hvað, mínum 15. mánuði á þingi og á þessum tíma hef ég verið formaður fjárlaganefndar og þingflokksformaður og nú ráðherra. Þetta er búið að vera nokkuð ævintýralegur rússíbani, maður hefur þurft að læra mjög mikið og mjög hratt og ég líklega hef ekki þurft að læra svona mikið og svona hratt bara í mínu lífi á jafn stuttum tíma, sem er auðvitað bara mjög ánægjulegt og áhugavert allt saman. En þingstörfin hafði ég auðvitað einhverja hugmynd um úr mínu fyrra starfi. Við vorum auðvitað mjög mikið í sambandi og samvinnu við stjórnvöld, við gerð kjarasamninga, og komið fyrir þingnefndir og svo framvegis. Þetta er mun umfangsmeira starf heldur en ég reiknaði með. Og ég myndi segja að stemningin í þinginu sé bara nokkuð góð, sérstaklega hjá stjórnarliðum. Það var bara söknuður að fara úr þinginu yfir í ráðuneytið vegna þess að samvinnan, innan stjórnarflokkanna og stjórnarþingmanna, hefur verið með afbrigðum góð.“
Hún hefur verið einstök, er það ekki? Það eru haldnir sameiginlegir þingflokksfundir stjórnarflokkanna reglulega. Ég þekki engin fordæmi þess.
„Nei, ég reyndar ekki heldur. Ég hef verið það stutt á þingi, en það er kannski til marks um, hvað á ég að segja, svona andann í hópnum að maður fer yfir í ráðuneyti og eftir þennan stutta tíma kveður með miklum söknuði að vera ekki í hringiðunni alla daga vegna þess að þarna hefur maður bara myndað alveg ótrúlega sterk og góð tengsl við þingmenn úr stjórnarliðinu, einhverja sem maður þekkti fyrir og aðra sem maður hefur kynnst. Það er svona það sem ég tek út úr þingstörfunum, er þetta jákvæða. Það sem ég hef heyrt auðvitað og líka upplifað sem þingflokksformaður, þá hefur stjórnarandstaðan verið mjög hörð í horn að taka í ótrúlegustu málum. Það hefur verið sett hér met í málþófi. Það hefur verið sett met í umræðum um fríverslunarsamninga við önnur ríki …“
Sem allir eru í raun og veru sammála um.
„Já, já. Og svo núna varðandi lækkun virðisaukaskatts á eldsneyti, þau finna alltaf eitthvað. Og það sem stóð mest í stjórnarandstöðunni núna var auðvitað þessi varnagli sem við vildum setja er varðar Samkeppniseftirlitið og í rauninni heimild til þess að grípa inn í ef þetta skilar sér ekki til neytenda. Sem ég held og þykist vera nokkuð viss um að mikill meirihluti landsmanna sé hlynntur slíkri heimild vegna þess að það hefur verið tortryggni og hún er ekki að ástæðulausu, svo sannarlega ekki.“
Við sáum það líka bara um áramótin þegar gjaldtökubreytingin varð til þess að í raun og veru álagning á eldsneyti hækkaði.
„Einmitt. Og það er svo sannarlega ekki að ástæðulausu og bæði Bílgreinasambandið, verðlagseftirlit ASÍ og fleiri hafa bent á, fært fyrir því góð rök að, og tölur virðast benda til og staðfesta að sú ráðstöfun hafi ekki skilað sér að öllu leyti til neytenda heldur farið í aukna álagningu. Þannig að það er ekki að ástæðulausu að fólk hafi ákveðnar efasemdir eða ákveðna tortryggni í garð olíufélaganna, bara svona í sögulegu samhengi, allt frá olíusamráðinu stóra sem var á sínum tíma og líka að þær greiningar sem hafa verið gerðar, varðandi sveiflur á heimsmarkaðsverði, að hækkanir virðast skila sér hraðar heldur en lækkanir. Stéttarfélagið Viska gerði nú ágætis úttekt á þessu nýlega sem gefur bara fullt tilefni til þess að setja þennan varnagla og auðvitað treysti ég því að þetta skili sér að fullu til neytenda. En framganga stjórnarandstöðunnar í málinu í gær var bara með hreinum ólíkindum og ég svona velti fyrir mér hvort að stjórnarandstaðan hafi virkilega haldið það að hún væri að tala inn í hjörtu kjósenda eða almennings í landinu þegar hún var að reyna að sannfæra þingheim um það að markaðurinn gæti bara séð um þetta og honum væri fyrir fyrirmynd að hún gæti bara séð um þetta og honum væri fyllilega treystandi til þess að skila þessu til neytenda. En ástæðan er auðvitað, þetta er varnagli. Ég leyfi mér að vona að, að það komi ekki til þess að það þurfi að beita þessu. Þetta snýst líka auðvitað um traust, ef við hefðum ekki haft þetta þarna inni, þá hugsa ég að almenningur hefði haft verulegar efasemdir um að þetta væri aðgerð sem myndi raunverulega skila sér að fullu til neytenda. En ég vona að þetta verði til þess að það myndist meira traust gagnvart þessari aðgerð.“
