Ólafur Þór Hauksson héraðssaksóknari upplýsti fyrir ári að sakamálarannsókn svonefnds Namibíumáls væri lokið. Enn hefur þó engin niðurstaða fengist um hvort ákært verði í málinu eða það fellt niður.
Namibíumálið hófst í nóvember 2019 þegar RÚV sýndi Kveiks-þátt þar sem Jóhannes Stefánsson setti fram ásakanir um að Samherji hefði greitt mútur til embættis- og stjórnmálamanna í Namibia í skiptum fyrir veiðiheimildir. Jóhannes stýrði starfsemi Samherja í Namibíu um miðjan síðasta áratug.
Alþingi veitti 200 milljónir í rannsóknina
Umfjöllun Kveiks vakti gríðarlega athygli haustið 2019. Að frumkvæði þingmanna Samfylkingarinnar veitti Alþingiembætti héraðssaksóknara 200 milljóna króna aukafjárveitingu til að hefja sakamálarannsókn á grundvelli þeirra upplýsinga sem fram komu í þættinum.
Samtals fengu níu núverandi og fyrrverandi starfsmenn Samherja réttarstöðu sakbornings og voru boðaðir til yfirheyrslu. Þar til málinu lýkur formlega, með ákæru eða niðurfellingu, halda þeir þeirri stöðu.
Þrátt fyrir ítarlega fjölmiðlaumfjöllun síðustu ár hafa engin gögn birst opinberlega sem renna stoðum undir ásakanir Jóhannesar Stefánssonar um að mútur hafi verið greiddar fyrir veiðiheimildir.
Ólafur Þór vanhæfur gagnvart einum sakborninga
Í viðtali við RÚV fyrir ári sagði Ólafur Þór að rannsókninni væri lokið og að næsta skref væri að meta hvort ákæra skyldi gefin út eða málið fellt niður.
Einn sakborninga í Namibíumálinu er Jón Óttar Ólafsson, fyrrverandi starfsmaður Ólafs Þórs hjá embætti sérstaks saksóknara, forvera embættis héraðssaksóknara. Jón Óttar starfaði síðar sem ráðgjafi fyrir Samherja og fór meðal annars til Namibíu til að afla upplýsinga um stöðu mála hjá Jóhannesi Stefánssyni.
Haustið sem leið lýsti Ólafur Þór því yfir að hann væri vanhæfur til að rannsaka Jón Óttar í öðru sakamáli. Sú staðreynd vekur spurningar um hvernig staðið verður að þeim hluta Namibíumálsins sem snýr að fyrrverandi undirmanni hans.
