„Markmið okkar er að Trolli.is verði áfram öflugur, óháður frétta-, upplýsinga- og mannlífsvefur sem endurspeglar lífið á svæðinu, fyrr og nú, með áherslu á það sem er jákvætt, uppbyggjandi og gefandi, án þess þó að missa sjónar á fjölbreytileika mannlífsins. Þó að við tökum formlega við rekstrinum í dag höfum við þegar verið að setja inn efni á vefinn í aprílmánuði og hafa lesendur því eflaust orðið varir við ákveðnar áherslubreytingar. Þar höfum við meðal annars lagt áherslu á að taka viðtöl og kafa dýpra í sögur fólks á svæðinu,“ segir í tilkynningu og að haldið verði áfram á þeirri braut.
Í tilkynningunni kemur jafnframt fram að Selma er fædd á Akureyri, dóttir Gylfa Ægissonar, tónlistarmanns og fyrrverandi sjómanns frá Siglufirði, og Kristínar Maríu Jónsdóttur frá Akureyri. Selma er rafeindavirki og lögfræðingur að mennt og hefur einnig stundað nám í kerfisfræði og forritun. Þar kemur einnig fram að Smári er fæddur í Reykjavík, sonur Valgerðar Valtýsdóttur og Sæbjörns Jónssonar, trompetleikara og stofnanda og stjórnanda Stórsveitar Reykjavíkur um árabil. Smári er matreiðslumaður að mennt og starfaði lengst af á því sviði. Í dag er hann öryrki eftir alvarlegt hjartastopp og hjartaáfall haustið 2023.
