Ítalska ríkisstjórnin boðar nýja löggjöf sem ætlað er að draga enn úr hlutfalli nemenda af erlendum uppruna í skólum landsins. Einnig stendur til að banna notkun búrkna og slæðna í menntastofnunum. Þegar eru í gildi lög sem banna hjálmanotkun og önnur klæði sem gera erfitt að bera kennsl á viðkomandi, nema gildar ástæður séu fyrir hendi.
Forsætisráðherrann Giorgia Meloni boðaði nýju löggjöfina á samkomu ungliðahreyfingar flokks hennar, Bræðralags Ítalíu. Hún sagði jafnframt að foreldrum nemenda sem eigi verulega erfitt með að aðlagast verið gert skylt að læra ítölsku.
Þegar er hlutfall erlendra nemenda við skóla á Ítalíu takmarkað við þrjátíu prósent nema í undantekningartilfellum. Meloni sagði ekkert um hvaða breyting yrði á því. Samkvæmt tölum ítölsku hagstofunnar Istat eru innan við tólf af hundraði skólanemenda af erlendum uppruna.
Árið 2008 úrskurðaði æðsti stjórnsýsludómstóll landsins að heimilt væri að bera andlitsslæður í skólum af trúarlegum ástæðum en þeim sem það gerðu væri skylt að sýna andlit sitt væri þörf á auðkenningu.
Nýi hægriöfgaflokkurinn Futuro Nazionale hefur ákaft kallað eftir banni við að konur klæðist búrkum og beri slæður. Flokknum hefur vaxið mjög fiskur um hrygg í fylgiskönnunum frá því hann var stofnaður snemma árs.
