Trump-stjórnin undirbýr refsiaðgerðir gegn Alþjóðalega sakamáladómstólnum og fljótlega verður greint frá innihaldi þeirra. Reuters-fréttaveitan hefur þetta eftir tveimur heimildarmönnum kunnugum málinu.
Ríkisstjórn Donalds Trump hefur lengi viljað koma dómstólnum á kné og utanríkisráðherrann Marco Rubio boðaði í sumar að hann skyldi lagður niður. Bandaríkin viðurkenna ekki lögsögu hans og eiga ekki að honum aðild.
Sakamáladómstólnum var komið á laggirnar 2002, hann hefur aðsetur í hollensku borginni Haag og hefur það hlutverk að rannsaka og dæma í málum á borð við stríðsglæpi, glæpi gegn mannúð og hópmorð.
The Wall Street Journal hefur eftir opinberum heimildum að ákvörðun refsiaðgerða verði tilkynnt svo snemma sem í vikunni meðan leiðtogar heimsins taka þátt í Allsherjarþingi Sameinuðu þjóðanna.
Ástæða aðgerðanna er sögð sú að Alþjóðasakamáladómstóllinn hefur gefið út handtökuskipun gegn ísraelska forsætisráðherranum Benjamín Netanjahú og Yoav Gallant, fyrrverandi varnarmálaráðherra.
Þeir eru báðir grunaðir um glæpi gegn mannúð og stríðsglæpi á Gaza. Handtökuskipun er einnig í gildi fyrir Vladimír Pútín Rússlandsforseta.
Dómstóllinn hefur einnig rannsakað meinta stríðsglæpi Bandaríkjanna í Afganistan og Trump setti af stað refsiaðgerðir gegn fjórum dómurum vegna þess á fyrra kjörtímabili sínu. Volker Türk, mannréttindastjóri Sameinuðu þjóðanna, segir aðgerðirnar fara gegn réttarríkinu og virðingu fyrir lögum.
