Níu manna kviðdómur í Bandaríkjunum úrskurðaði í gær að auðkýfingurinn Elon Musk, einn stofnenda OpenAI, hefði beðið of lengi með málshöfðun gegn tæknifyrirtækinu, sem hannaði snjallmennið ChatGPT, öðrum stofnendum þess og Microsoft.
Musk hóf málið 2024, fjórum árum frá því hann lagði seinast eitthvað til fyrirtækisins. Það var of langur tími að mati kviðdómsins.
Ákvörðunin leiðir af sér að dómstóllinn tekur ekki afstöðu til þeirra raka Musks að fyrirtækið hefði haft í frammi svik með þeirri stefnubreytingu að hefja hagnaðardrifna starfsemi þvert á upprunaleg markmið þess að deila hugbúnaði frítt og vinna aðeins til hagsbóta mannkyni öllu.
Þróun tækninnar hefði átt að vera opið ferli. Musk sakaði fyrrum félaga sína þá Sam Altman og Greg Brockman um að hafa í eigin þágu nýtt 38 milljóna dala framlag hans sem ætlað var til að halda OpenAI gangandi sem rannsóknarstofu við þróun gervigreindar.
Með tilurð ChatGPT hafi OpenAI vaxið í að verða milljarða dala fyrirtæki og í raun dótturfélag Microsoft. Musk hefur sjálfur unnið að þróun eigin gervigreindar undir merkinu xAI.
Musk hefði getað knúið OpenAI til að gerast óhagnaðardrifið félag að nýju, stefnt hlutabréfaútboði þessi í tvísýnu og undið ofan af tengslum við stóra fjárfesta á borð við Amazon og Microsoft. Dómarinn hafði beðið kviðdóminn um ráðleggingar, þáði þær og staðfesti ákvörðun hans.
Lögmaður OpenAI sagði niðurstöðuna staðfesta að Musk hefði haft það eitt markmið að valda keppinauti sínum tjóni. „Hann getur sagt allar þær sögur sem hann lystir, en þegar á hólminn kemur eru þær bara það, sögur,“ sagði lögmaðurinn. Musk boðar áfrýjun.
