Bandaríska stríðsmálaráðherrans Pete Hegseth bíður þungt spurningaflóð um stöðu stríðsins gegn Íran þegar hann mætir til yfirheyrslu hjá hermálanefnd fulltrúadeildarinnar í dag.
Umræðuefnið er krafa Donalds Trump forseta um einnar og hálfrar biljónar dala framlag til hernaðarmála. Dan Caine, yfirmaður herforingjaráðsins, kemur einnig fyrir nefndina. Hegseth hefur ekki mætt nefndarmönnum frá því Bandaríkin og Ísrael hófu árásir á Íran 28. febrúar.
Þingmenn beggja flokka hafa lýst megnri óánægju með þær upplýsingar sem þeim hafa verið veittar um framgang Íransstríðsins og því má búast við fjörugum skoðanaskiptum í dag.
Donald Trump Bandaríkjaforseti segir Íran hernaðarlega búið að vera. Hann sagði þetta við Karl III Bretakonung og aðra gesti hátíðarkvöldverðar í Hvíta húsinu. Trump hafði ekki imprað á Íransstríðinu við Karl fyrr í konunglegri heimsókn hans til Washington.
Hann bætti við að Karli væri jafnvel meira í mun en honum sjálfum að Íranar kæmu sér ekki upp kjarnorkuvopnum. Heimsókn konungs er í tilefni þess að 4. júlí verða 250 ár liðin frá því að fulltrúar þrettán nýlenda lýstu yfir sjálfstæði frá breska heimsveldinu.
