Leikkonan og flugfreyjan Þrúður Vilhjálmsdóttir er látin, 53 ára að aldri. Hún lést á líknardeildinni í Kópavogi sunnudaginn 5. júlí eftir erfið veikindi. Vísir greindi frá andlátinu.

Þrúður útskrifaðist frá Leiklistarskóla Íslands árið 1997 og hóf sama ár leikferil sinn á sviði og í kvikmyndum. Hún lék meðal annars í Stikkfrí, 101 Reykjavík, Foreldrum, Djúpinu og Undir halastjörnu, auk sjónvarpsþáttanna Ástríði, Broti og Ófærð 3. Þá lagði hún einnig rödd við fjölda talsetninga og hljóðbóka.

Samhliða leiklistinni starfaði hún sem flugfreyja hjá Icelandair í um tvo áratugi, en hélt áfram að leika reglulega.

Í apríl greindi Þrúður frá því að hún glímdi við alvarleg veikindi. Þar hvatti hún fólk til að njóta lífsins og þeirra augnablika sem skipta máli.

Þrúður lætur eftir sig eiginmann sinn, Halldór Örn Óskarsson, son sinn Róbert Vilhjálm Ásgeirsson og aðra ástvini.

Útför hennar fer fram frá Hallgrímskirkju miðvikudaginn 15. júlí klukkan 13.