Hvenær í lífinu erum við hamingjusömust? Þetta er spurning sem margir velta fyrir sér á einhverjum tímapunkti ævinnar og svörin eru eflaust jafn mismunandi og fólkið sjálft.
Ný bandarísk könnun bendir þó til þess að margir upplifi mesta lífsánægju síðar á ævinni en ætla mætti – og að sterk tengsl við fjölskyldu og vini skipti þar meira máli en peningar eða starfsframi.
Könnunin var framkvæmd af neytendarannsóknarfyrirtækinu Cherry Data Signals og voru 6.442 einstaklingar, 65 ára og eldri, beðnir um að líta til baka og meta á hvaða tímabili þeir hefðu verið hamingjusamastir í lífinu.
Niðurstöðurnar benda til þess að margir upplifi aukna aukna ánægju fljótlega eftir fimmtugt, 52 ára nánar tiltekið, þegar starfsferillinn er orðinn stöðugri, fjölskyldu- og vinatengsl sterkari og fjárhagslegt öryggi meira en áður.
Þá hafi fólk oft meira svigrúm til að njóta áhugamála, ferðalaga og annarra lífsgæða.
Samskipti og tengsl við annað fólk reyndust skipta mestu máli þegar kemur að hamingju. Um 34 prósent þátttakenda sögðu vináttu og persónuleg tengsl vera helstu uppsprettu lífsánægju. Þar á eftir komu heilsa, sem 18 prósent nefndu, maki eða rómantískt samband með 15 prósent og starfsferill með 14 prósent. Aðeins 11 prósent töldu heimili eða húsnæði vera stærsta þáttinn í eigin hamingju.
Þá sögðust þrír af hverjum fjórum frekar velja ástina en auð ef þeir þyrftu að gera upp á milli.
Mikill munur reyndist þó vera á milli ríkja í Bandaríkjunum þegar kom að því hvenær fólk taldi sig hafa náð hámarki lífsánægju. Í Maryland og Mississippi sögðust þátttakendur hafa verið hamingjusamastir um 37 ára aldur, en í Kaliforníu og New York var meðalaldurinn 57 ár.
Höfundar könnunarinnar segja niðurstöðurnar benda til þess að hamingja tengist síður miklum auði eða frama en stöðugleika, góðri heilsu og sterkum tengslum við fjölskyldu og vini.
