Kennarar nýttu gervigreind til að laga námsefni að ólíkum þörfum
Grunnskólakennarar sem tóku þátt í íslensku þróunarverkefni nýttu gervigreind til að semja lesefni á mismunandi þyngdarstigum og einfalda texta fyrir nemendur með íslensku sem annað mál eða málþroskaröskun. Framhaldsskólakennarar lýstu meðal annars hvernig þeir útbjuggu gagnvirk verkefni, kennsluvefi og hermilíkön með aðstoð tækninnar.
Þetta kemur fram í skýrslunni Notkun gervigreindar í kennarastarfi sem Menntavísindastofnun Háskóla Íslands vann að beiðni Miðstöðvar menntunar og skólaþjónustu (MMS). Verkefnið hófst haustið 2025 og var unnið í samstarfi við Kennarasamband Íslands, Google og Anthropic. Kennurum á grunn- og framhaldsskólastigi var boðinn aðgangur að Gemini og Claude ásamt fræðslu og stuðningi.
Tólin nýttust einkum við undirbúning kennslu
Kennarar nýttu tólin einkum til að móta hugmyndir, útbúa verkefni og skipuleggja kennslu. Af þeim sem svöruðu síðari könnuninni og höfðu notað tólin við undirbúning kennslu töldu 72% grunnskólakennara og 88% framhaldsskólakennara að þau hefðu nýst frekar eða mjög vel.
Við lok verkefnisins lýstu 86% svarenda á grunnskólastigi og 87% á framhaldsskólastigi frekar eða mjög miklum áhuga á áframhaldandi aðgangi að tólunum. Þórdís Jóna Sigurðardóttir, forstjóri MMS, segir niðurstöðurnar sýna hvernig tæknin geti stutt kennara við að mæta ólíkum þörfum nemenda og gefið þeim meira svigrúm til að þróa kennsluna.
Kennarar kölluðu eftir hagnýtri fræðslu á íslensku
Þátttakendur lögðu áherslu á fræðslu á íslensku, dæmi úr kennslustofunni og tækifæri til að deila reynslu sín á milli. Aðgengi að tólunum og stuðningi var mismunandi eftir skólastigum. Í skýrslunni er jafnframt bent á að fræðslan þurfi að ná til sannprófunar upplýsinga, gagnrýnins mats á því sem tólin skila og verndar persónuupplýsinga.
Matið byggir á tveimur könnunum meðal þátttakenda, þeirri fyrri í febrúar og mars og þeirri síðari í maí og júní 2026. Hlutföllin endurspegla reynslu og sjálfsmat þeirra kennara sem svöruðu. Skýrsluhöfundar taka fram að niðurstöðurnar séu ekki ætlaðar til alhæfinga um alla kennara landsins.
