Loftbrú veitir þeim með lögheimili á Vestfjörðum, hluta af Norðurlandi vestra, Norðurlandi eystra, Austurlandi, Hornafirði og Vestmannaeyjum fjörutíu prósenta afslátt af sex flugleggjum á ári. Hún er ætluð fólki sem fer í einkaerindum til höfuðborgarinnar en ekki fyrir ferðir í atvinnuskyni eða hefðbundnar vinnuferðir.
Til stendur að ráðast í breytingar á kerfinu og miða frekar við fasta krónutölu upp á sjö eða níu þúsund krónur í staðinn.
Afstaðan valdi vonbrigðum
Ráðherra fundaði með stjórn SSA í gær en stjórnin hefur áður gagnrýnt áformin. Þar óskuðu stjórnarmenn eftir því að breytingunum yrði frestað svo hægt yrði að vinna í sameiningu að lausn um framtíðarfyrirkomulag hennar. Í tilkynningu frá SSA segir að þeirri beiðni hafi verið hafnað.
„Afstaða ráðherra veldur sérstökum vonbrigðum í ljósi þess að stjórn SSA telur, miðað við afstöðu sem stjórnarþingmenn hafa lýst, að þingmeirihluta skorti fyrir einhliða breytingum á Loftbrúnni,“ segir í tilkynningunni.
Án samráðs
Á fundinum hafi stjórnin gagnrýnt samráðsleysi við undirbúning breytinganna. Þegar Loftbrúin var mótuð hafi hún verið unnin í þéttu samráði við landshlutasamtök sveitarfélaganna, Byggðastofnun og þingmenn.
„Stjórn SSA telur óásættanlegt að stjórnvöld boði svo veigamiklar breytingar á úrræðinu án þess að eiga fyrst raunverulegt samráð við sveitarfélögin og landshlutasamtökin sem breytingarnar snerta beint,“ segir í tilkynningunni.
Ganga gegn upphaflega markmiðinu
Breytingarnar séu til þess fallnar að draga verulega úr jöfnunaráhrifum Loftbrúar.
„Breytingarnar ganga gegn upphaflegum markmiðum Loftbrúar um að jafna búsetuskilyrði og bæta aðgengi íbúa landsbyggðarinnar að þjónustu. Stjórn SSA ítrekar því áskorun sína til ráðherra um að fresta breytingunum og hefja raunverulegt samráð um framtíð Loftbrúar,“ segir í tilkynningunni.
